Qazaqstanda 2024 jyly kreatıvti ındýstrııa boıynsha qazaq-ıtalııa mádenıet ortalyǵy ashylady

<p>Mádenıet jáne aqparat mınıstri Aıda Balaeva Italııanyń Qazaqstandaǵy Elshisi Marko Albertımen kezdesti, dep habarlaıdy <a href="https://kaz.inform.kz/?_gl=1*1cookbu*_ga*MTMxOTQ2NjU5MC4xNjk4Mzc1OTcw*_ga_Y44SMVECD5*MTY5ODM3NTk2OS4xLjAuMTY5ODM3NTk2OS42MC4wLjA.&amp;pk_vid=1dac2fba2c02ff6916983759715aaacc" target="_blank" rel="noopener">Kazinform</a> mınıstrliktiń baspasóz qyzmetine silteme jasap.</p>

Baspasóz qyzmetiniń málimetterine qaraǵanda, kezdesý barysynda Aıda Balaeva Qazaqstan Eýropa elderimen mádenıet jáne óner salasyndaǵy yntymaqtastyqty damytýǵa erekshe mán beretinin atap ótti.

«Qazaqstan úshin «Venetsııa bıennalesi – 2024» aýqymdy sharasyna qatysý mańyzdy oqıǵa bolmaq. Ulttyq pavılon aıasynda sýretshilerimizdiń jumystarynyń kórmesimen qatar óner salasynda sheberlik sabaqtaryn ótkizemiz. Atalǵan mádenı alań qazaqstandyq sheberler men talanttardyń shyǵarmashylyǵy men óneri arqyly elimizdiń tarıhı-mádenı murasymen jaqsyraq tanysýǵa múmkindik beredi», - dedi mınıstr.

Elshi Marko Albertı 2023 jyly Almatyda ıtalııalyq mádenı ortalyq, sondaı-aq Ortalyq Azııa men Kavkaz aımaǵyndaǵy tuńǵysh Mádenıet ınstıtýty ashylǵanyn kezeginde atap ótti.

«Mádenıet ınstıtýtynyń negizgi maqsaty – jańa shyǵarmashylyq talanttarǵa nazar aýdara otyryp, ıtalııa tili men mádenıetin nasıhattaý. Biz osyǵan baılanysty Qazaqstannyń joǵary oqý oryndarymen yntymaqtastyqqa erekshe qyzyǵýshylyq tanytyp otyrmyz. Olarmen birlesip 30 bastamany júzege asyrýǵa nıettimiz. 2024 jyly Qazaqstanda kreatıvti ındýstrııa boıynsha qazaq-ıtalııa mádenıet ortalyǵyn ashýdy josparlap otyrmyz», - dedi Elshi.