Qazaqstanda 2021 jyly avtomobıl óndirisi 24% ósken

NUR-SULTAN. QazAqparat – Qazaqstanda 2021 jyly avtomobıl óndirisi 24% ósken. Bul týraly QR Premer-Mınıstri Álıhan Smaıylovtyń Qazaqstan mashına jasaýshylar odaǵy basqarmasynyń tóraǵasy Meıram Pishembaevpen kezdesýinen málim boldy, dep habarlaıdy QazAqparat.

Úkimettiń resmı saıtynyń habarlaýynsha, kezdesý barysynda mashına jasaýshylar odaǵynyń basshysy osy salanyń jaı-kúıi, syrtqy faktorlardyń áseri jaǵdaıynda alda turǵan mindetter men damý perspektıvalary týraly baıandady.

2021 jyldyń qorytyndysy boıynsha temir jol mashınasyn jasaý 300%-ǵa, aýyl sharýashylyǵy mashınasyn jasaý 50,4%-ǵa, taý-ken metallýrgııasy mashınasyn jasaý 29,3%-ǵa, avtomobıl óndirisi 24%-ǵa, elektrotehnıkalyq mashına jasaý 16,7%-ǵa jáne munaı-gaz mashınasyn jasaý 14,2%-ǵa eleýli ósim kórsetti.

Kezdesý barysynda Mashına jasaý salasyn damytýdyń 2024 jylǵa deıingi jol kartasyn iske asyrý, sala kásiporyndaryn otandyq shıkizatpen qamtamasyz etý, jańa óndiristerdi qurý jáne jumys istep turǵandaryn jańǵyrtý úshin qoljetimdi qarajat bólý, otandyq taýar óndirýshilermen offteık-kelisimsharttar jasasý, sondaı-aq mashına jasaý salasyndaǵy óndiris kólemin arttyrý máseleleri talqylandy.

M. Pishembaevtyń aıtýynsha, 2021 jyly ımporttyń jalpy kólemi $41 mlrd qurady, onyń ishinde $17 mlrd nemese 41%-y otandyq mashına jasaý ónimderine tıesili. Osyǵan baılanysty ımportty otandyq óndirispen almastyrý máselesi – atalǵan naryqty damytyp, eksportqa shyǵý úshin óte ózekti.

Kezdesý qorytyndysy boıynsha Álıhan Smaıylov Úkimet salany yntalandyrý jáne Qazaqstanda mashına jasaýdy damytý úshin qolaıly jaǵdaılar jasaý jumysyn odan ári jalǵastyratynyn atap ótti.