Qazaqstanda 200-den astam nemis kompanııasy jumys isteıdi
Búgin GFR-diń Shyǵys Eýropa, Kavkaz jáne Ortalyq Azııa elderimen yntymaqtastyq máseleleri jónindegi ýákili Mattıas Lıýtenberg bastaǵan delegatsııa elordaǵa keldi.
«Biz ekonomıka salasynda tyǵyz baılanystamyz. Germanııanyń Ortalyq Azııa elderimen saýda aınalymynyń seksen paıyzdan astamy Qazaqstannyń úlesine tıesili. Qazaqstanda barlyǵy 200-den astam nemis kompanııasy jumys isteıdi. Eýropalyq Odaq - Qazaqstannyń eń mańyzdy saýda seriktesi. Bizdiń mádenı baılanysymyz da ornyqty damý ústinde. Gete ınstıtýtynyń Qazaqstandaǵy ókildigi elderimizdiń arasyndaǵy mádenı yntymaqtastyqqa yqpal etip, 15 nemis áriptes mektepterinen basqa, nemis tilin úırenýdiń basqa da múmkindikterin usynady. Joǵary oqý oryndary boıynsha birlesken jobanyń biri - qazaq-nemis ýnıversıtetin aıtýǵa bolady», - dedi Mattıas Lıýtenberg BAQ-tyń qatysýymen ótken baspasóz máslıhatynda.
Resmı ýákildiń málimdeýinshe, Qazaqstanda turatyn etnıkalyq nemister jáne Qazaqstannan shyqqan jáne qazir Germanııada turatyn nemister ekijaqty qatynasta mańyzdy ról atqarady.
«Germanııa men Eýropalyq Odaq aldaǵy onjyldyqta da Qazaqstan úshin senimdi seriktes retinde qoldaý kórsetip, áreket etedi. Dıplomatııalyq qatynastardyń qazirgi mereıtoıy osy qol jetkizgen jetistikterimizben toqtap qalady degendi bildirmeıdi. Aldymyzda bolashaqta birge sheshýdi talap etetin kóptegen mindet tur. Osyǵan baılanysty men ekonomıkalyq yntymaqtastyqty keńeıtýdi, jańartylatyn energııa, sýtegi nemese sırek kezdesetin paıdaly qazbalar salasyndaǵy yntymaqtastyqty nyǵaıtýdy qajet dep túsinemin», - deıdi ol.
Sondaı-aq, sheteldik meıman qazaq-nemis bilim berý júıesin odan ári jetildire túsý ıdeıasyn usyndy.