Qazaqstanda 20 zamanaýı gospıtal salynady – Asqar Mamın

NUR-SULTAN. QazAqparat – Qazaqstanda 20 zamanaýı gospıtal salynady. Bul týraly BAQ ókilderimen kezdesý barysynda QR Premer-Mınıstri Asqar Mamın aıtty, dep habarlaıdy QazAqparat tilshisi.

«Pandemııa jaǵdaıynda, qysqa ǵana ýaqyttyń ishinde 17 aýrýhana salynyp, negizgi aýyrtpalyqty moınyna aldy», - dedi Asqar Mamın BAQ ókilderiniń saýalyna oraı.

Onyń atap ótýinshe, atalǵan aýrýhanalar eń zamanaýı qural-jabdyqtarmen qamtamasyz etilgen. Sonymen qatar medıtsına qyzmetkerleriniń jumys isteýine de barlyq jaǵdaı jasalǵan. Dál osy jaıt pandemııa kezinde, naýqastar sany artqanda olardy emdeýge múmkindik berdi.

«Josparymyzda búkil Qazaqstanda 20 zamanaýı gospıtal salý bar. Osy turǵyda Túrkııanyń tájirıbesin zerdeledik. Túrkııaǵa arnaıy túrde jumys saparymen baryp, salynǵan gospıtaldarda boldym. Túrkııa bul salada serpilis jasaǵan. Qazirgi ýaqytta Qazaqstanda sondaı modelderdi júzege asyratyn bolamyz. Búginde memlekettik-jekeshelik áriptestik arqyly birneshe gospıtal salynyp jatyr. Olar bizge aldaǵy birneshe ondaǵan jylǵa daıyn bolýymyzǵa múmkindik beredi», - dedi Asqar Mamın.