Qazaqstanda 20 myńnan astam azamattyń 3 jáne odan da kóp páteri bar

NUR-SULTAN. QazAqparat - Nur-Sultan qalasynyń turǵynynda bir turǵyn úı kesheninde 65 páteri, jalpy onyń menshiginde 67 páter bary anyqtalǵan. Kórsetilgen turǵyn úılerdi jalǵa berý faktisi tekserilýde. Bul týraly keńirek QazAqparat tilshisine QR QM Memlekettik kirister komıtetiniń Baqylaý departamenti dırektorynyń mindetin atqarýshy Ánýar Súleımenov aıtyp berdi.

Memlekettik kirister komıteti kóleńkeli ekonomıkaǵa qarsy kúres sheńberinde páterdi zańsyz jalǵa berýshilerdi anyqtaý jumystaryn jalǵastyryp jatyr. Vedomstvo qyzmetkerleri ártúrli memlekettik aqparattyq júıelerdiń derekteri men basqa aqparat kózderin paıdalanady.

«Bul PIK málimeti, sanaly azamattar men kórshilerden túsken aqparat bolýy múmkin», - dedi Ánýar Súleımenov.

Aldyn ala jasalǵan qorytyndy boıynsha, elimizde qazirgi ýaqytta 3 jáne odan da kóp páterge menshik quqyǵy bar, alaıda dara kásipker retinde tirkelmegen jáne tıisti salyqtar tólemegen 20 myńnan astam tulǵa anyqtalǵan. Olardyń arasynda 10-nan astam páterge menshik quqyǵy bar 150 tulǵa bar, budan basqa bir tulǵanyń ıeliginde bir turǵyn úı kesheninde 65 páteri bary anyqtalǵan.

«Joǵaryda keltirilgen derekter jalǵa berilýine egjeı-tegjeıli taldaý júrgiziletin qashyqtyqtan monıtorıng jasaý arqyly alyndy. Jalpy, 2019 jyldyń 5 aı ishinde júrgizilgen jumys nátıjeleri boıynsha dara kásipker retinde 7 403 jeke tulǵa tirkelgen. Bul byltyrǵy jylmen salystyrǵanda 22%-ǵa nemese 1320 jeke tulǵaǵa kóp. Salyqtyq túsim somasy 37 %-ǵa ósti jáne 7 252,1 mln teńgeni quraıdy nemese 1 951,3 mln teńgege kóp», - dedi ol.

Ánýar Súleımenovtiń aıtýynsha, jeke tulǵalardyń da, sondaı-aq zańdy tulǵalardyń da dara kásipker retinde tirkelmesten jyljymaıtyn múlikti «jalǵa» berýge quqyǵy bar.

«2018 jyldyń basynan bastap patent negizindegi salyq rejimin qoldanatyn DK úshin salyq mólsherlemesi, atap aıtqanda páterdi jalǵa berýshiler úshin 2%-dan 1% -ǵa deıin tómendedi. Bıýdjetti esepteýdiń mundaı shemasy jaldamaly eńbekti paıdalanbaıtyn jáne tabysy jylyna 3 528 AEK-ten aspaıtyn jeke tulǵalar úshin qoljetimdi. Máselen, eger jalǵa berýden túsetin tabys aıyna 100 myń teńgeni qurasa, tıisinshe, salyq somasy 1000 teńgeni quraıdy. Eger siz birneshe páterdi jalǵa berseńiz jáne, mysaly, páterdi jınaý úshin jaldamaly jumysshylaryńyz bolsa, onda siz jeńildetilgen deklaratsııany qoldana alasyz. Bul kezde salyq mólsherlemesi 3% quraıdy, tólem jarty jylda bir ret tabysty alý faktisi boıynsha júrgiziledi», - dedi ol.