Qazaqstanda 2 mln-nan astam adam tumaýǵa qarsy vaktsına aldy

ASTANA. QazAqparat – Respýblıka boıynsha tumaýǵa qarsy 2 136 575 adam vaktsına aldy. Bul - jalpy halyqtyń 11,3 paıyzy. Atalǵan derekti QR DSM sanıtarııalyq-epıdemıologııalyq baqylaý komıteti tóraǵasynyń orynbasary Maral Raqymjanova keltirdi, dep habarlaıdy QazAqparat tilshisi.

«Aýrýdyń aldyn alýdyń eń tıimdi ádisi – vaktsınatsııa. Bıyl bıýdjet qarajatyna Reseıde shyǵarylǵan «GRIPPOL +» vaktsınasynyń 2,3 mln dozasy satyp alyndy. Vaktsına quramynda bıylǵy maýsymda ózekti bolyp otyrǵan vırýstarǵa qarsy shtamdar bar. Vaktsına jalpy respýblıka halqynyń 12%-yn qamtýǵa múmkindik beredi. Dúnıejúzilik densaýlyq saqtaý uıymynyń usynysy boıynsha halyqtyń keminde 10%-yn qamtý qajet», - dedi Maral Raqymjanova ortalyq kommýnıkatsııalar qyzmetinde ótken baspasóz máslıhatynda.

Mınıstrlik ókiliniń aıtýynsha, osal topqa jatatyn azamattarǵa tumaýǵa qarsy vaktsına tegin salynady.

«Medıtsınalyq uıymda dıspanserlik esepte turǵan jáne jetim, ata-ana qamqorlyǵynan aıyrylǵan balalar, sonymen qatar balalar úıiniń tárbıelenýshileri úshin vaktsına tegin. Odan bólek, bul sanatqa medıtsına qyzmetkerleri de kiredi. Tumaýǵa qarsy vaktsınatsııa qazan aıynda bastaldy. Respýblıka boıynsha 2 136 575 adam tumaýǵa qarsy vaktsına aldy. Bul - jalpy halyqtyń 11,3%», - deıdi ol.

Sondaı-aq, maman vaktsınadan keıin asqyný jaǵdaıynyń tirkelmegenin tilge tıek etti.

Aıta ketsek, tumaýǵa qarsy vaktsına alǵandardyń 468 579 nemese 22 paıyzy 14 jasqa deıingi balalar. Al 1 667 772 ne bolmasa 78 paıyzy eresekter.

Buǵan deıin habarlaǵanymyzdaı elimizde qazan aıynan bastap 1 mln 27 myń adam JRVI juqtyrǵan.