Qazaqstanda 2 medıtsınalyq poıyzdyń jumysy qaıta jandandy

ASTANA. QazAqparat - Bıyl elimizdiń 10 óńirinde 64 myń turǵynǵa medıtsınalyq kómek kórsetken eki medıtsınalyq poıyzdyń jumysy qaıta jandandy. Bul týraly Parlament Májilisindegi Úkimet saǵatynda QR Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.

«Bıyl praktıkalyq densaýlyq saqtaý qajettiligine sáıkes, óńirlerge 2981 jas maman, onyń ishinde aýylǵa 797 adam baǵyttaldy. Mınıstrlik ákimdiktermen birlesip turaqty negizde mamandardyń kelý monıtorıngin júzege asyrady. Al jergilikti organdar kelgen jas mamandardy turaqtandyrý baǵytynda tıisti qadamdardy iske asyrýy qajet», - dedi A. Ǵınııat aýyldaǵy densaýlyq saqtaý máselesin talqalýǵa arnalǵan Úkimet saǵatynda.

Onyń aıtýynsha, shalǵaı aýyldardyń turǵyndaryna medıtsınalyq qyzmetterdi jetkizý maqsatynda kólik medıtsınasy damyǵan. Medıtsınalyq kómek jáne konsýltatsııalyq-dıagnostıkalyq qyzmetter kórsetetin 149 jyljymaly medıtsınalyq keshen jumys istep jatyr.

«Bıyl elimizdiń 10 óńirinde (Atyraý, Aqtóbe, Almaty, Abaı, Jetisý, Batys Qazaqstan, Shyǵys Qazaqstan, Qyzylorda, Pavlodar, Mańǵystaý oblystary) 64 myń turǵynǵa medıtsınalyq kómek kórsetken eki «Járdem» jáne «Salamatty Qazaqstan» medıtsınalyq poıyzynyń jumysy qaıta jandandy. Medıtsınalyq avıatsııany aýyl turǵyndaryn tasymaldaıtyn jáne shuǵyl kómek kórsetetin 33 áýe kemesi (20 ushaq jáne 13 tikushaq) júzege asyrady. Aýylda jedel medıtsınalyq kómek kórsetý úshin 595 brıgada jumys isteıdi, osy baǵytta 1,5 mln shaqyrtýǵa qyzmet kórsetildi», - dedi mınıstr.

Budan buryn habarlanǵandaı, aýyldaǵy kadrlyq qamtamasyz etýge taldaý jirgizilip, 1 700-den astam medıtsına qyzmetkeriniń, onyń ishinde 1000-nan astam dárigerdiń tapshylyǵy anyqtaldy.

Foto: gov.kz