Qazaqstanda 2,6 myń shaqyrym jolda qozǵalys ashylady
Memleket basshysynyń tapsyrmasyna sáıkes bıyl avtomobıl joldarynyń 2,6 myń shaqyrymynda, atap aıtqanda myna joldarda qozǵalys ashylady dep josparlanyp otyr.
- «Qaraǵandy-Balqash-Qapshaǵaı»
- «Aqtóbe-Atyraý-Astrahan»
- «Taldyqorǵan-Óskemen»
- «Qalbataý-Maıqapshaǵaı»
- «Merki-Býrylbaıtal»
- «Úsharal-Dostyq»
- «Uzynaǵash-Otar»
- «Kókshetaý-Petropavl-Qorǵan»
- «Qostanaı-Denısovka».
Jalpy alǵanda, avtomobıl joldarynyń 4 myń shaqyrymynda qurylys jumystary júrgiziledi. Respýblıkalyq jáne jergilikti jol jelilerindegi jol-qurylys jumystaryna 100 myńǵa tarta adam tartylmaq.
Іske asyrylyp jatqan jobalar aıasynda jumysqa jol-qurylys tehnıkasynyń 10 myń birligi, 77 usaqtaý qondyrǵysy, 57 beton jáne 87 asfalt-beton óndiretin zaýyt jumyldyrylǵan.
Respýblıkalyq mańyzǵa ıe joldardyń tehnıkalyq jaǵdaıyn qalpyna keltirý jáne kútip ustaý úshin avtomobıl joldarynyń 1,5 myń shaqyrymy kúrdeli jáne ortasha jóndeý jumystarymen qamtylady. Bul maqsatqa 59 mlrd. teńge qarastyrylǵan.
Joldardy kúrdeli jóndeýden ótkizý aıasynda mańyzdy jobalardy iske asyrý jumystary jalǵastyrylady. Olardyń arasynda Batys Qazaqstan oblysyndaǵy jalpy uzyndyǵy 280 shaqyrymdy quraıtyn avtojolǵa asfalt-beton jabyndysyn tóseý jobasy bar.
Sonymen qatar, bıyl Almaty qalasy mańyndaǵy «Altyn Orda» bazary aýdanynda avtojol ýchaskesin keńeıtý jumystary aıaqtalady.
Osylaısha, jaqsy jáne qanaǵattandyrarlyq jaǵdaıdaǵy respýblıkalyq avtojoldar úlesi bıyl 89% deıin jetkizilip, І jáne ІІ sanattaǵy joldar uzyndyǵy 36% deıin ulǵaıtylmaq.
Ótken jyl qorytyndylarynda avtomobıl joldarynyń 641 shaqyrymynda qozǵalys ashylǵan bolatyn. Atap aıtqanda:
- «Temirtaý-Qaraǵandy-Balqash-Qapshaǵaı»
- «Nur-Sultan-Pavlodar»
- «Pavlodar-Semeı»
- «Kókshetaý - Petropavl – RF shekarasy»
- «Beıneý-Aqjigit», «Taskesken-Baqty»
- «Şýchınsk – Zerendi»
- «Qandyaǵash-Maqat»
«Jetibaı – Jańaózen» joldary.
Avtojoldar salasyn damytý aıasynda byltyr respýblıkalyq joldardyń 4,4 myń shaqyrymy qurylys jáne qaıta jańartý jumystarymen qamtylyp, 1,1 myń shaqyrymy kúrdeli jáne ortasha jóndeýden ótkizildi.
Atalmysh jumystardyń barlyǵy jaqsy jáne qanaǵattandyrarlyq jaǵdaıdaǵy respýblıkalyq mańyzǵa ıe avtomobıl joldar úlesin 88% deıin jetkizýge múmkindik berdi. І jáne ІІ sanattaǵy avtomobıl joldarynyń uzyndyǵy 34% deıin arttyrylyp, 8,2 myń shaqyrymdy qurady.
Aqyly joldar týrasynda aıtsaq, elimizde búgingi tańda jalpy uzyndyǵy 682 shaqyrymdy quraıtyn 4 aqyly jol bar. Ótken jyly olardan túsken qarajat mólsheri 5,4 mlrd teńgeni qurady. Túsimder aqyly joldar men tólem alý júıesin kútip ustaýǵa jumsalady.
2019 jyldyń jeltoqsanynda ınvestıtsııalyq konkýrs qorytyndysy boıynsha joldardyń 11 myń shaqyrymynda tólem alý júıesin ornatý jáne qyzmet kórsetý týraly kelisimshartqa qol qoıyldy. Qujatqa sáıkes rekonstrýktsııadan ótken avtojoldarynyń 5,7 myń shaqyrymynda tólem alý júıesi bıyl ornatylady dep josparlanǵan.