Qazaqstanda 190 stantsııa elektr energııasyn óndiredi
«Búgingi otyrystyń TMD-nyń barlyq elderi úshin ózekti ekenin atap ótkim keledi. Bizdiń elderimizdiń dostyq qarym-qatynastardy nyǵaıtýǵa umtylysy jáne óńirdiń elektr energetıkasy salasyndaǵy tıimdi yntymaqtastyqty damytýǵa serpin berýi sózsiz mańyzdy. Búgin aıtarlyqtaı mazmundy kún tártibi usynylǵan. Biz ornyqty, tómen kómirtekti elektr energetıkasyn damytýdyń, ulttyq jáne óńirlik energetıkalyq qaýipsizdikti qoldaý men TMD elderiniń jańartylatyn energetıkadaǵy yntymaqtastyǵy máselelerin talqylaımyz. TMD Elektr energetıkalyq keńesi janyndaǵy Úılestirý keńesi engizgen birqatar qujattardy qarastyramyz», - dedi Energetıka vıtse-mınıstri Jandos Nurmaǵanbetov otyrystyń ashylýynda.
Onyń aıtýynsha, Qazaqstanda elektr energııasyn óndirýdi 190 stantsııa júzege asyrady, olardyń jalpy qýaty 24 gıgavatty qurasa, qolda bar qýaty 19 gıgavatqa jetedi. 2021 jyldyń qorytyndysy boıynsha, 114,5 mlrd gıgavatt saǵat óndirilgen elektr energııasynda kómir stantsııalarynyń úlesi – 69%, gaz stantsııalarynyń úlesi – 20%, sý elektr stantsııalarynyń úlesi – 7,4%, jańartylatyn energııa kózderiniń úlesi 3,6% bolǵan.
Jańa óndirý qýattaryn iske qosýǵa qajetti kólem men qurylymyn anyqtaý úshin 2035 jylǵa deıin energetıkalyq keshenniń damýyn modeldeý júrgizildi, óndiristi tutyný boljamy eseptelip, 2035 jylǵa deıingi energetıkalyq balans ázirlendi.
«Jalpy alǵanda, 2035 jylǵa qaraı Qazaqstan energetıkasyna 24,5 gıgavatt qajettiligi júktemesin jabý úshin jańa generatsııany engizý qajet. Qazaqstannyń kómirtekti beıtaraptyqqa qol jetkizý baǵytyn qabyldaǵanyn eskerip, 11 gıgavatt jańa generatsııa tómen kómirtekti generatsııa kózimen usynylatyn bolady. Biz munda atom stantsııasy, jańartylatyn energııa kózderi týraly aıtyp otyrmyz. Sondaı-aq, dástúrli gaz generatsııasy men kómir generatsııasyn jańǵyrtý 6,5 gıgavatty quraıdy», - dedi Jandos Nurmaǵanbetov.