Qazaqstanda 19 sý qoımasy jańartylady
15:09, 20 Qazan 2022
ASTANA. QazAqparat - 2025 jylǵa deıin 1,7 tekshe shaqyrym jınaqtaý kólemi bar 9 jańa sý qoımasy salynady. Bul týraly QR Ekologııa, geologııa jáne tabıǵı resýrstar mınıstri Serikqalı Brekeshev aıtty, dep habarlaıdy QazAqparat tilshisi.
«Sý bógetteriniń tozýy máselesin sheshý boıynsha da jumys júrip jatyr. 2017 jyldyń basynda elde 41 apattyq sý qoımasy boldy. Sońǵy 5 jylda 16-sy jóndeldi. Bıyl taǵy 6 qurylysjaı qalpyna keltiriledi. Al 2025 jylǵa qaraı qalǵan 19 sý qoımasyn qaıta jańartý josparlanǵan. Bul shamamen 800 mln tekshe metr sýdy únemdeýge múmkindik beredi», - dedi mınıstr ortalyq kommýnıkatsııalar qyzmetindegi baspasóz máslıhatynda.
Serikqalı Brekeshevtiń dereginshe, qosymsha sý kólemin qamtamasyz etý úshin 2025 jylǵa deıin 1,7 tekshe shaqyrym jınaqtaý kólemi bar 9 jańa sý qoımasyn salý josparlanǵan.
«Onyń ishinde byltyr Túrkistan oblysyndaǵy «Keńsaı-Qosqorǵan-2» sý qoımasy paıdalanýǵa berildi. Qalǵandary boıynsha jobalyq qujattama ázirlenip jatyr», - dedi ol.