Qazaqstanda 182 jańartylatyn energııa nysany iske qosylady

NUR-SULTAN. QazAqparat – 2025 jylǵa qaraı belgilengen qýaty 4 400 MVt bolatyn 182 jańartylatyn energııa kózderi nysany iske qosylatyn bolady. Bul týraly Memleket basshysynyń Joldaýyndaǵy tapsyrmalardy oryndaýǵa arnalǵan Úkimet otyrysynda Energetıka mınıstri Nurlan Noǵaev aıtty, dep habarlaıdy QazAqparat tilshisi.

«Sońǵy jyldary Úkimet álemdik tájirıbeni eskere otyryp, sondaı-aq jańartylatyn energııa kózderi (JEK) nysandaryn damytý boıynsha júıeli sharalar qabyldaýǵa baǵyttalǵan memlekettik saıasatty belsendi júrgizý jolymen JEK sektoryndaǵy ınvestıtsııalyq ahýaldy jaqsartý boıynsha eleýli qadamdar jasady. Qazirgi ýaqytta respýblıkada belgilengen qýaty 1897 MVt bolatyn 123 JEK nysany bar. 2025 jylǵa qaraı belgilengen qýaty 4 400 MVt bolatyn shamamen 182 JEK nysany iske qosylatyn bolady. Bul JEK úlesiniń 6%-ǵa teń josparly nysanaly ındıkatorynyń oryndalýyn qamtamasyz etedi», - dedi N. Noǵaev.

Onyń aıtýynsha, atalǵan jobalardy iske asyrý aıasynda shamamen 1 trln teńge ınvestıtsııa tartylyp, qosymsha 6 mlrd. kVt/saǵ jasyl energııa óndirý jáne 20 000 ýaqytsha jáne 1 000 turaqty jumys ornyn qurý josparlanǵan.

«JEK úlesin 2020 jylmen salystyrǵanda 2 esege ulǵaıtý jónindegi maqsatqa qol jetkizý úshin mınıstrlik tıisti jumystardy júrgizetin bolady. Atap aıtqanda, JEK jobalaryn irikteý boıynsha aýktsıondyq saýda-sattyqty jyl saıyn ótkizý, JEK naryǵyna qatysýshylarǵa qoıylatyn tehnıkalyq talaptar engizý, gıdroelektr stantsııasyn damytý josparyn oryndaý, halyq pen shaǵyn-orta bıznes arasynda shaǵyn kólemdi JEK tetigin jetildirý jobalaryn iske asyrý kózdelgen», - dedi mınıstr.

Eske salsaq, Prezıdent Joldaýynda energııa tapshylyǵy máselesin aldyn alý sharalaryn atady.

1 qyrkúıek kúni QR Prezıdenti Qasym-Jomart Toqaev «Halyq birligi jáne júıeli reformalar – el órkendeýiniń berik negizi» atty halyqqa Joldaýyn jarııalady. Joldaýdyń tolyq mátini myna jerde.