Qazaqstanda 180-ge jýyq qar barysy mekendeıdi
Ekologııa mınıstrliginiń aqparatyna súıensek, 20-21 qazanda Qyrǵyzstan astanasy Bishkek qalasynda Qar barysy men onyń ekojúıelerin saqtaý jónindegi jahandyq baǵdarlamanyń (GSLEP) basqarýshy komıtetiniń jetinshi otyrysy ótip jatyr.
«Qar barysy – Qazaqstannyń sırek kezdesetin iri jyrtqyshtarynyń biri. Ol 1978 jyly elimizdiń Qyzyl kitabyna engizildi. Sonymen qatar qar barysy Qazaqstan Respýblıkasynyń memlekettik sımvoly bolyp tabylady jáne qazaq halqynyń baǵa jetpes tabıǵı jáne mádenı murasyn beıneleıtin úlken qoǵamdyq mańyzy bar «, - dedi Á.Shalabekova.
Qazaqstan aýmaǵynda elimiz úshin ǵana emes, jalpy álemdik ekologııa úshin mańyzdy ról atqaratyn bıoalýantúrliliktiń úlken shoǵyry bar. Degenmen, aıta ketý kerek, Qazaqstanda sırek kezdesetin jáne joıylyp ketý qaýpi tóngen ósimdikter men janýarlar túri de bar. Qar barysy solardyń qatarynda. Sońǵy málimetterge sáıkes, elimizde 140-180-ge jýyq qar barysy mekendeıdi.
Elimizde halyqaralyq agenttiktermen, úkimettik emes sektormen jáne azamattyq qoǵamdastyqpen birlese klımattyq ózgeristerge beıimdelý sharalaryn engizý, bıoalýantúrlilikti saqtaý jáne ekojúıelerdi ornyqty basqarý boıynsha jumystar júrgizilip jatyr. Osylaısha, ornyqty damýdyń 17 maqsatyna qol jetkizýde Qazaqstan ulttyq strategııalyq jáne baǵdarlamalyq qujattarǵa 80-ge jýyq nysanaly kórsetkishti engizdi.
Sonymen qatar 2021 jyly BUUDB JEQ jobasynyń qoldaýymen Qazaqstanda alǵash ret spýtnıktik telemetrııany qoldaný qolǵa alyndy.
«Júrgizilip jatqan jumystardyń arqasynda qar barysyn saqtaý boıynsha kóptegen máseleler sheshilýde. Alaıda olardyń birazy áli de ózekti bolyp qala beredi. Qazaqstanda 1990-shy jáne 2000-shy jyldardyń basynda baıqalǵan brakonerlik jáne qar barysy derıvattarynyń zańsyz saýdasy sońǵy jyldary óte sırek kezdesedi», - dedi vıtse-mınıstr otyrys barysynda.
Aıta keteıik, Qar barysy men onyń ekojúıelerin saqtaý jónindegi jahandyq baǵdarlamanyń (GSLEP) basqarýshy komıtetine 12 el múshe.
Ashyq kózderden alynǵan foto