Qazaqstanda 17 myńǵa jýyq azamat kóktemde áskerge shaqyrylady

NUR-SULTAN. QazAqparat - Qorǵanys isteri jónindegi departamentterinde, basqarmalary men bólimderinde 2022 jylǵy kóktemgi áskerge shaqyrý naýqany aldynda jastardy zerdeleý jumystary bastaldy. Áskerge 18-27 jas aralyǵyndaǵy azamattar shaqyrylady. Bul týraly QazAqparat Qorǵanys mınıstrligine silteme jasap habarlaıdy.

Jeke isterdi zerdeleý ýaǵynda áskerge shaqyrylýshylardyń saýalnama derekteri anyqtalyp, árbir jas azamatpen jáne onyń ata-analarymen áńgimelesedi. Zerdeleý barysynda áskerge shaqyrylýshylardyń alǵan mamandyqtary mindetti túrde eskerilip, sonymen qosa olardyń moraldyq jáne iskerlik qasıetteri, densaýlyq jaǵdaıy, dene bitimi, jalpy bilimi, arnaıy daıyndyǵy men otbasy jaǵdaıy jónindegi málimet naqtylanady.

Ákimshilik nemese qylmystyq jaýapkershilikke tartylǵan, tergeýde júrgen, zańsyz qoǵamdyq birlestikterdiń nemese dástúrli emes dinı aǵymdardyń músheleri retinde arnaıy esepte turǵan adamdar basty nazarǵa alynady.

«Aldyn ala zerdeleý bastapqy kezeńde qandaı da bir ásker túrleri men tekterinde áskerı qyzmet ótkerýge ázir jastardyń sapalyq quramyn anyqtaýǵa múmkindik beredi. Áskerge shaqyrýdan bosatý negizderiniń zańdylyqtary, onyń ishinde densaýlyq jaǵdaıy da tekseriledi. Bir kúnde shamamen 800-900 áskerge shaqyrylýshy keledi. Áskerge shaqyrý jasyndaǵy barlyǵy 90 myńnan astam jasóspirim zerdelenedi», — dedi Qarýly Kúshteri Bas shtaby Uıymdastyrý-jumyldyrý jumystary departamenti bastyǵynyń orynbasary polkovnık Aıan Eslıamov.

Jergilikti áskerı basqarý organdary Qazaqstan Respýblıkasynyń Qarýly Kúshterine, Ulttyq qaýipsizdik komıtetiniń Shekara qyzmetine, Memlekettik kúzet qyzmetine jáne Ulttyq ulanyna áskerge shaqyrýdy júzege asyrady. Bıyl kóktemde shamamen 17 000 azamat áskerge shaqyrylady. Olardyń 6 500-den astamy Qarýly Kúshterdiń bólimderi men bólimshelerinde qyzmet etedi.