Qazaqstanda 17,5 mln adam ınternetpen qamtylǵan – Baǵdat Mýsın

NUR-SULTAN. QazAqparat – Pandemııaǵa qaramastan Qazaqstan eldi mekenderin ınternetpen qamtý jumystary jalǵasýda. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtyp berdi, dep habarlaıdy QazAqparat tilshisi.

«Halyqty tolǵandyratyn eń basty másele – sapaly ınternetke qoljetimdilikti ulǵaıtý bolyp otyr. Elimizdegi 18,7 mln halqymyz 6500-ge jýyq eldi mekende turady. Solardyń ishinen 4 751 eldi mekende túrli tehnologııalar boıynsha (3G, 4G, optıka-talshyq jáne t.b.) jalpy ınternet bar deýge bolady. Osylaısha elimizdegi 17,5 mln halyq ınternetpen qamtylǵan», - dedi mınıstr Ortalyq kommýnıkatsııalar qyzmetinde ótken brıfıngte.

Onyń aıtýynsha, ınternet sapasyn ulǵaıtý maqsatynda eki aýqymdy joba iske asyrylady.

«Birinshi joba «Aýylǵa optıka tartý» dep atalady. Osy joba aıasynda 1257 aýylǵa optıkalyq jeliler tartý kózdelgen jáne 75 mlrd teńge somasynda operatorlardan ınvestıtsııa tartylǵan. Bıyl pandemııaǵa qaramastan 944 aýylǵa optıka jelilerin tartamyz. Ázirge 835 eldi mekenge optıka jelileri jetkizilgen, 3500 memlekettik nysanǵa – mektepter, aýrýhanalar, ákimdikterge ınternet tartylǵan. Biraq ınternet te sý men gaz tartqandaı bolady. Mysaly, aýylǵa jalpy sý kelse, ony aýyl ishinde taratý basqa másele. Sol sekildi optıkany da aýylǵa jetkizdik, al aýyl ishindegi úılerge ınternet jetkizý máselesi basqa joba aıasynda sheshiledi. Osy joba aıasynda Sharing kelisimshartyna qol qoıdy. Ol degenimiz barlyq úsh mobıldik operator úsh qurylǵy ornatpaı, bir qurylǵy arqyly qyzmet kórsete alady», - dedi B. Mýsın.