Qazaqstanda 16 myńǵa jýyq sheteldik jumys istep júr

NUR-SULTAN. QazAqparat - 2020 jylǵy 1 qarashadaǵy jaǵdaı boıynsha jergilikti atqarýshy organdardyń ruqsatymen Qazaqstan aýmaǵynda 15 832 sheteldik jumys istep júr, dep habarlaıdy QazAqparat Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.

«Sheteldik jumys kúshin tartýǵa berilgen ruqsattyń ishinde mynadaı sanattar bar: birinshi sanat – 658 (basshylar jáne olardyń orynbasarlary), ekinshi sanat – 3 430 (qurylymdyq bólimshelerdiń basshysy). Olardyń negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady – tıisinshe 7 302 adam jáne 1 058 adam. Sondaı-aq maýsymdyq jumysqa – 1 728 adam, al korporatıvtik aýystyrý sheńberinde – 1 656 adam tartyldy», delingen habarlamada.

Mınıstrliktiń málimetinshe, qazirgi ýaqytta Qazaqstanda sheteldik jumys kúshin paıdalanatyn 1 770 jumys berýshi bar. Olarda 455 myńǵa jýyq Qazaqstan azamaty jumys isteıdi, bul jalpy jumysshy sanynyń 96 paıyzy.

«Eńbekshi mıgranttar keletin negizgi elder kelesi: Qytaı – 3 459 adam, Ózbekstan – 1 693 adam, Túrkııa – 1 621 adam, Úndistan – 1 145 adam, Ulybrıtanııa – 1 038 adam», delingen habarlamada.

Esterińizge sala keteıik, ishki eńbek naryǵyn qorǵaý maqsatynda QR Eńbek jáne halyqty áleýmettik qorǵaý mınıstrligi jyl saıyn elimizge sheteldik mamandardy tartýǵa kvota belgileıdi. 2020 jyly kvota mólsheri jumys kúshine shaqqanda 0,32% nemese 29,3 myń birlik.