Qazaqstanda 1388 travmatolog eńbek etedi

ASTANA. QazAqparat – 20 mamyrda Dúnıejúzilik travmatologııa kúni atalyp ótedi. Eldegi travmatolog mamandar jyl basynan 199 myńnan astam naýqasqa kómek kórsetken, dep habarlaıdy QazAqparat.

Travmatolog dáriger mamandyǵy – bul zeıindilikti, jaýapty sheshimdi jyldam ári durys qabyldaýdy, joǵary biliktilik pen tájirıbeni talap etedi. Patsıenttiń densaýlyǵy ǵana emes, tutas ómiri bilikti mamannyń qolynda bolatyn jaǵdaılar az emes.

«Búgingi tańda elimizde 1388 travmatolog jumys isteıdi. Olar tek 2022 jyly 199 myńnan astam patsıentke medıtsınalyq kómek kórsetti.

Qazaqstannyń travmatologııa bólimshelerinde ozyq, ınnovatsııalyq tehnologııalar, onyń ishinde iri býyndardy endoprotezdeý jáne emdeý-dıagnostıkalyq artroskopııa, aıaq-qoldardyń synýy kezindegi jabyq az ınvazıvti osteosıntez tehnologııalary, omyrtqany hırýrgııalyq túzetý men bekitýdiń zamanaýı júıeleri jáne basqasy qoldanylady», - delingen Densaýlyq saqtaý mınıstrliginiń málimetinde.