Qazaqstanda 13 myńnan astam medıtsına qyzmetkeri «Spýtnık V» vaktsınasyn saldyrdy
«Memleket basshysynyń tapsyrmasymen Qazaqstan Respýblıkasynda 2021 jyly 1 aqpanda Reseıde shyǵarylǵan «Gam-Kovıd-VAK» (Spýtnık V) vaktsınasymen KVI-ge qarsy vaktsınatsııalaý bastaldy. Vaktsınatsııa barlyq óńirde júrýde, 778 egý pýnkti ashyldy, olardyń 166-sy qazir iske qosyldy, barlyǵy tońazytqyshpen qamtamasyz etilgen. 9 myńnan astam medıtsına qyzmetkeri oqytyldy», - dedi mınıstr QR Prezıdenti janyndaǵy Ortalyq kommýnıkatsııalar qyzmetinde ótken brıfıngide.
10 aqpandaǵy jaǵdaı boıynsha 13 301 adamǵa ekpe egildi. Vaktsınatsııany birinshi bolyp ınfektsııalyq statsıonar, jedel medıtsınalyq kómek, sondaı-aq KVI-men syrqattanýdyń joǵary qaýpi bar basqa da beıindegi medıtsına qyzmetkerleri alady. Odan keıin qatarǵa pedagog, kúsh qurylymdarynyń qyzmetkerleri qosylady.
Vaktsınatsııanyń qorǵaý áseri birinshi dozadan soń 12-14 kúnnen keıin baıqalady, biraq tolyq ımmýnıtet qalyptasý úshin eki doza qajet, ekpeni araǵa 21 kún salyp qaıtalaý usynylady. Tolyq kýrstan keıin 1,5 aı ishinde organızmde ımmýndyq reaktsııa paıda bolady, osyǵan baılanysty egilgen adamdar profılaktıka sharalaryn saqtaýy qajet.
«Vaktsınatsııalaý jospary birneshe ret aıtyldy. Qazaqstanda Qaraǵandy farmatsevtıkalyq kesheni shyǵaratyn «Spýtnık V» vaktsınasyn jetkizý jáne paıdalaný josparlanýda. Qazirdiń ózinde 90 myń doza kóleminde birinshi partııanyń óndirisi bastaldy, ol Biryńǵaı dıstrıbıýtordyń qoımalaryna jáne odan ári óńirlerge aqpan aıynyń sońyna qaraı jóneltiledi. Shilde aıyna deıin óndiris kólemi 2 mln dozaǵa jetedi»,- dedi mınıstr.