Qazaqstanda 13 mln gektar aýmaqqa egin salyndy
«Búginde kóktemgi egis jumystary elimizdiń barlyq óńirlerinde bastaldy, oblystardyń jedel derekteri boıynsha 13 mln ga egildi, bul jospardyń 62%, onyń ishinde dándi daqyldar – 9,5 mln ga nemese 61%, maıly daqyldar – 1,9 mln ga nemese 58%, kókónis-baqsha daqyldary – 248,1 myń ga nemese 90%, kartop – 163,2 myń ga nemese jospardyń 83% egildi. Jalpy bıylǵy egis alańy 23,4 mln gektar bolady, bul 2022 jylǵy deńgeıden 68,6 myń ga kóp», - dedi E. Qarashókeev.
Dándi jáne dándi-burshaqty daqyldardyń egis alańdaryn 117 myń gektarǵa, azyqtyq daqyldardy 36,5 myń gektarǵa jáne qant qyzylshasyn 6,7 myń gektarǵa ulǵaıtý kózdelip otyr.
Astyq, kókónis-baqsha, kartop boıynsha josparlanǵan alańdar ishki naryq qajettilikterin tolyq qamtamasyz etýge múmkindik beredi.
«Sharýalar barlyq qajetti resýrstarmen qamtamasyz etilgen. Kóktemgi egis jumystaryn júrgizýge, aýyl sharýashylyǵy taýaryn óndirýshilerdi tuqymmen, agrohımııamen, tehnıkamen qamtý, qarjylandyrý máselelerin úılestirý maqsatynda Respýblıkalyq jedel shtab quryldy, onyń quramyna barlyq múddeli organdar men uıymdar, oblys ákimderiniń orynbasarlary engizildi. Jyl basynan beri jedel shtabtyń 5 otyrysy ótti», - dedi mınıstr.