Qazaqstanda 13 arnaıy ekonomıkalyq aımaq jumys isteıdi

NUR-SULTAN. QazAqparat – Arnaıy ekonomıkalyq aımaqtar Qazaqstannyń barlyq derlik óńirlerinde jumys isteıdi. Búginde elimizde 13 AEA bar, dep habarlaıdy QazAqparat tilshisi.

Bul týraly Indýstrııa jáne ınfraqurylymdyq damý mınıstrligi ındýstrııalyq damý komıtetiniń tóraǵasy Іlııas Ospanov aıtyp berdi.

Spıkerdiń aıtýynsha, otandyq arnaıy ekonomıkalyq aımaqtardyń ekonomıkanyń belgili bir perspektıvaly salalaryna kóńil bólýge múmkindik beretin salalyq ereksheligi bar.

«Otandyq AEA uzartý quqyǵymen 25 jylǵa qurylady jáne el aýmaǵynda joǵary tehnologııalyq jáne básekege qabiletti óndirister qurý maqsatynda otandyq jáne sheteldik ınvestıtsııalardy, tehnologııalardy, quzyretterdi tartý úshin daıyn óndiristik alań bolady. Qazirgi ýaqytta el aýmaǵynda 13 AEA jumys isteıdi, olar barlyq óńirlerde qurylǵan», -dedi Іlııas Ospanov ortalyq kommýnıkatsııalar qyzmetinde.

AEA qatysýshylary úshin arnaıy quqyqtyq rejım qoldanylady, olar - salyq mindettemesinen bosatý, kedendik bajdan bosatý, ınjenerlik-kommýnıkatsııalyq ınfraqurylymy bar daıyn óndiristik alań usyný jáne kvotalar men shekteýlerden tys sheteldik jumys kúshin tartý múmkindikteri.

«Búgingi tańda otandyq AEA ınvestıtsııa qorjynynda 21 myńnan astam jumys orny qurylǵan, 1,2 trln teńgege shamamen 315 joba iske asyrylǵan. Jobalar ekonomıkanyń barlyq bazalyq salalarynda usynylǵan jáne qosylǵan quny joǵary jáne kúrdeli taýarlardy óndirýge baǵyttalǵan», - dep tolyqtyrdy komıtet tóraǵasy.