Qazaqstanda 12 perzenthana salynyp, 32 kópbeıindi aýrýhana jańǵyrtylady

ASTANA. QazAqparat - Elimizdiń iri qalalary men óńirlerinde halyq sanynyń ósýine baılanysty perınataldy ortalyqtar men aýrýhanalarda oryn tapshylyǵy baıqalady. Osy oraıda Úkimette medıtsınalyq mekemelerdiń jetispeýshiligin toltyrý máselesi talqylandy, dep habarlaıdy primeminister.kz.

Memleket basshysynyń tapsyrmalaryn júzege asyrý sheńberinde 2024-2026 jyldary perınataldy 12 ortalyq salý josparlanǵan.

Medıtsınalyq jańa mekemeler Astana, Almaty, Shymkent, Qaraǵandy, Qostanaı, Atyraý, Jezqazǵan, Qyzylorda, Taraz, Oral, Qaskeleń qalalary men Túrkistan oblysynyń Temirlan aýylynda ashylady.

Aıta ketý kerek, olardy josparlaý jáne jobalaý úshin Health planning halyqaralyq tehnologııasy qoldanyldy.

ul kezeńde jer ýchaskelerin baǵalaý júrgizildi, medıtsınalyq-tehnologııalyq tapsyrma men jobanyń negizdemesi aıaqtaldy.

Óńirlerde zamanaýı perınataldyq ortalyqtardy salý balaly bolýdy josparlaýǵa, júktilikke jáne bosanýǵa, sondaı-aq bosanǵannan keıingi kómek kórsetýge baılanysty medıtsınalyq qyzmet túrlerin sapaly jańa deńgeıge kóteredi.

Sonymen qatar «Aýylda densaýlyq saqtaýdy jańǵyrtý» ulttyq jobasy aıasynda 2023-2024 jyldary jumys istep turǵan 32 kópbeıindi aýdandyq aýrýhanany jańǵyrtý josparlanǵan.

Olar joǵary mamandandyrylǵan KT, MRT, angıograftar, ýltradybystyq apparattar, zerthanalyq, reanımatsııalyq, rentgendik-dıagnostıkalyq, fızıoterapııalyq, hırýrgııalyq jáne endoskopııalyq beıneaqparattyq jabdyqtar jáne t.b. jabdyqtarmen qamtamasyz etilgen.

Barlyǵy 965 dana medıtsınalyq tehnıka satyp alý josparlanyp otyr.

Sondaı-aq 2025 jylǵa deıin Astana, Almaty, Shymkent, Qaraǵandy, Aqtóbe jáne Semeı qalalarynda 6 ýnıversıtettik klınıka salynady.

Sonymen qatar ınvestorlardyń bastamasymen Petropavl, Túrkistan jáne Kókshetaý qalalarynda bastalǵan jobalar aıaqtalady.

«Azamattardyń densaýlyǵy qashanda basty basymdyqqa ıe, al medıtsınalyq qyzmetterdiń sapasyn arttyrý Memleket basshysynyń erekshe baqylaýynda. Bul turǵyda elimizde ana men balanyń densaýlyǵyna muqııat nazar aýdarylyp otyr. Respýblıkada jańa zamanaýı densaýlyq saqtaý obektileriniń ashylýy mıllıondaǵan azamattarǵa joǵary sapaly medıtsınalyq qyzmet túrin alýǵa kómektesedi», - dep atap ótti A. Kólginov.