Qazaqstanda 118 myń tonna un qory bar

NUR-SULTAN. QazAqparat – QR Aýyl sharýashylyǵy birinshi vıtse-mınıstri Aıdarbek Saparov Qazaqstanda qansha un qory saqtalǵanyn aıtty, dep habarlaıdy QazAqparat tilshisi.

«7 sáýirdegi jaǵdaı boıynsha eldegi un qory 118 myń tonnaǵa jetedi, onyń ishinde: turaqtandyrý qorlarynda - 10,4 myń tonna, «aınalym shemasy» aıasynda – 22 myń tonna, óndirýshilerde – 48,6 myń tonna, qoımalarda – shamamen 20 myń tonna jáne saýda obektilerinde – 18 myń tonna bar. Atalǵan kólem ishki qajettilikti qamtamasyz etýge tolyq jetkilikti», - dedi A. Saparov ortalyq kommýnıkatsııalar qyzmetinde ótken baspasóz máslıhatynda.

Sonymen birge, Azyq-túlik korporatsııasy resýrstarynda 800 myń tonnadan astam astyq bar, olar qajet bolsa jaǵdaıdy turaqtandyrý úshin ishki naryqqa jiberiledi.

«Qańtar aıynda óńirlerge áleýmettik nan úshin bıdaıdy arzandatylǵan baǵamen – 90 myń teńgege satý jóninde sheshim qabyldanǵan edi. Alaıda qańtar-aqpan aılarynda esh suranys bolǵan joq. Tek naýryz aıynan bastap ótinimder túsip jatyr», - dedi Aıdarbek Saparov.

Buǵan deıin Astyq óńdeýshiler odaǵy elimizde bir jarym aptaǵa ǵana jeterlik bıdaı qory qalǵanyn málimdegen edi. Astyq ósirýshiler men óńdeýshiler bıdaıdy bólise almaı daý týǵany, bıdaı taýsylsa barlyq dıirmender jumysyn toqtatýǵa májbúr ekeni aıtylǵan.

Óz kezeginde Aıdarbek Saparov elde eshqandaı astyq tapshylyǵy joq ekenin habarlady. 1 sáýirdegi jaǵdaı boıynsha respýblıkada 6,4 mln tonna astyq bolǵan.

Іshki naryqta tapshylyq týdyrmaý úshin jáne un tartatyn kásiporyndarǵa júktemeni azaıtý maqsatynda Syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııa 15 sáýir men 15 maýsym aralyǵynda bıdaı men un eksportyn kvotalaý sheshimin qabyldady.

Bıdaı kvotasynyń kólemi – 1 mln tonna, un – 300 myń tonna.