Qazaqstanda 11 myńnan astam adamǵa izdeý salynǵan

NUR-SULTAN. QazAqparat – Qazirgi ýaqytta 11 133 adam izdeýde júr, olardyń 2 247-i – habarsyz ketken, dep habarlaıdy QazAqparat tilshisi QR Bas prokýratýrasynyń Quqyqtyq statıstıka jáne arnaıy esepke alý jónindegi komıtetine silteme jasap. 

«Qazaqstanda izdeýdi ishki ister, ulttyq qaýipsizdik, qorǵanys, ekonomıkalyq tergeý qyzmeti, memlekettik kúzet jáne jemqorlyqqa qarsy qyzmet organdary júrgizedi. Barlyq izdestirý isterin tirkeýdi, sondaı-aq memleketaralyq aqparattyq derekter qorymen ózara is-qımyldy QR Bas prokýratýrasynyń Quqyqtyq statıstıka jáne arnaıy esepke alý jónindegi komıteti júzege asyrady», - dep atap ótken Komıtettiń Facebook paraqshasynda jarııalanǵan habarlamada.

«Іz-túzsiz joǵalǵandardyń basym kópshiligi Almaty qalasynda (328), Almaty (308), ShQO (221) jáne Qaraǵandy oblystarynda (221). Olardyń ishinde kóbinese 30 ben 49 jas aralyǵyndaǵy er adamdar (76%) ártúrli sebeptermen joǵalǵan. 1723-i — úılerinen shyǵyp ketip oralmaǵan, 74-i — avtokólikterimen, 36-sy — jumystan shyǵyp, kelmegen. Sondaı-aq, elimizde tergeýden jáne sottan jasyrynǵan 2 453 adam izdestirilýde. Jekeleı alǵanda olardyń ishinde alaıaqtyq (451), urlyq (270) jáne kisi óltirgeni (166) úshin Almatyda — 463, Almaty oblysynda — 245 jáne Shyǵys Qazaqstan oblystarynda — 203 adamǵa izdeý salynǵan. Olardyń arasyndaǵy 89%-y negizinen 31 men 40 jastaǵy er adamdar», - dep túsinikteme bergen Komıtette.