Qazaqstanda 11 mln adam gazben qamtamasyz etilgen - Bolat Aqsholaqov

NUR-SULTAN. QazAqparat – Bıyl 59 eldi mekenge gaz beriledi. Bul týraly QR Energetıka mınıstri Bolat Aqsholaqov aıtty, dep habarlaıdy QazAqparat tilshisi.

«2021 jyly gaz óndirý kólemi 53,8 mlrd tekshe metrdi qurady. Al 2022 jylǵa arnalǵan jospar – 54,5 mlrd tekshe metr. 29,4 mlrd tekshe metr taýarlyq gaz óndirildi, 2022 jylǵa jospar – 29,6 mlrd tekshe metr. Gaz eksporty - 7,2 mlrd tekshe metr, 2022 jylǵa arnalǵan gaz eksportynyń kútiletin kólemi – 5,4 mlrd tekshe metr. Eksporttyń tómendeýi ishki tutynýdyń artýymen baılanysty», - dedi ol mınıstrliktiń keńeıtilgen alqa otyrysynda.

Mınıstrdiń atap ótýinshe, 2022 jylǵy 1 qańtardaǵy jaǵdaı boıynsha eldi gazdandyrý 57,7 paıyz nemese 11 mln adam gazǵa qol jetkizdi.

«Óńirlerdi damytýǵa arnalǵan transfertter aıasynda osy jyly 45,8 mlrd teńge somasyna gaz ınfraqurylymy qurylysynyń 96 jobasyn iske asyrý josparlanýda, onyń ishinde 59 eldi mekendi nemese 79 myń adamdy gazben qamtamasyz etý úshin 38 nysandy aıaqtaý josparlanǵan», - dedi Bolat Aqsholaqov.