Qazaqstanda 100-den astam aýyl joıylý aldynda tur - UEM
Bul týraly Ortalyq kommýnıkatsııalar qyzmetinde ótken baspasóz máslıhatynda «Aýyl - el besigi» jobasy týraly sóz qozǵaǵan Ulttyq ekonomıka vıtse-mınıstri Ermek Alpysov málim etti, dep habarlaıdy QazAqparat tilshisi.
«Qazaqstanda 6,5 myń aýyldy eldi meken bar. Onyń ishinde 3,5 myń aýyldyń halyq sany 500 adamnan az. Qazirgi ýaqytta Qazaqstanda halqy 50 adamnan tómen 500-ge tarta aýyl bar. Árbir salanyń standarttary bar. Mysaly, eger bala sany 15-ten tómen bolsa, ol aýylda bastaýysh mektep jabylady. Sol sebepti, damymaı otyrǵan aýyldarda áleýmettik nysandardy salýdyń qajeti joq shyǵar dep oılaımyn. Ol jerge 200-300 mln teńge turatyn sý júıelerin tartýǵa múmkindik joq», - dedi Ermek Alpysov.
Vıtse-mınıstrdiń aıtýynsha, árbir óńirlerde ózindik jospar-jobalar bar. Negizinen aımaqtarda aýyldar basqa irgeli aýyldarǵa qosylý jolymen joıylyp barady.
«Keıbir halqy az aýyldardyń balalary basqa aýyldaǵy mektepke baryp oqıdy. Keı jerlerde jańadan ınternattar ashylyp jatyr. Bul - ómir. Ómirdiń ózindik talaby da sondaı. Eger damymaıtyn bolsa, ol aýyldar aqyryndap jabylady. Biraq, ol aýyldardy bizdiń barynsha qoldaýymyzdyń arqasynda, jergilikti bıýdjet arqyly aýdan ortalyǵyna nemese aýyldyq okrýg ortalyǵyna kóshirý máselesi sheshilýde», - deıdi ol.
Ermek Alpysov óz sózinde qazirgi ýaqytta elimizde 100-den astam aýyldyq eldi mekenniń qurý qaýpi baryn atap ótti.
«Ol jerde áleýmettik nysandar - mektepter men feldsherlik pýnktter jabylýy múmkin. Keıbir jerde mektepter jabylyp ta qaldy. Biraq, adamdar áli turyp jatyr. Ol jerge jergilikti ákimdikter arqyly balalarǵa jaǵdaı jasalýda. Aýyl ákimdikterine tasymaldaý kóligine qarajat bólý qarastyrylǵan», - deıdi vıtse-mınıstr.
Onyń aıtýynsha, «Aýyl - el besigi» jobasy sheńberinde 2019 jyly Qazaqstanda 52 aýdan ortalyǵy jańǵyrtylyp, bul jaqyn jyldary 700 myń aýyl turǵynynyń ómirin ózgertýge múmkindik beredi.