Qazaqstanda 10 jyl saıyn turǵyn úı kommýnaldyq sharýashylyǵynyń normatıvtik bazasy jańartylmaq
Bul jaıynda búgin Astanada atalǵan salany ǵylymı turǵyda qamtamasyz etýge negizdelgen ǵylymı-tájirıbelik konferentsııada TKSh-ny damytýdyń qazaqstandyq ǵylymı-tehnıkalyq ortalyǵynyń bas dırektory Damır Egizbaev aıtty.
Onyń sózine qaraǵanda, TKSh salasy 200-den astam normatıvtik-tehnıkalyq qujattarmen retteledi. «Bıyl biz 20 normatıvterdi qaıta óńdeımiz, sondaı-aq elimizde ár 10 jyl saıyn TKSh-nyń barlyq normatıvtik bazasy jańartylyp otyrýy úshin jyl saıyn 20-30 normatıvterdi qaıta óńdeýdi josparlap otyrmyz»,-dep atap ótti D. Egizbaev.
Bas dırektor bıyldan bastap Qazaqstanda alǵash ret turǵyn úı kommýnaldyq sharýashylyǵy salasynda qoldanbaly ǵylymı zertteýlerdiń keshendi baǵdarlamasyn júzege asyrý bastalǵanyn eskerip ótti. Ol 4 baǵyt jáne 6 taqyryp boıynsha iske asyrylmaq. Atap aıtqanda, onyń ishinde sýmen qamtamasyz etý men sý burý, energııa únemdeý, jylýmen qamtamasyz etý jáne kommýnaldyq qaldyqtar turǵysyndaǵy jumystar qamtylǵan.