Qazaqstanda 10 oblystyq jáne 1 respýblıkalyq Dostyq úıi bar - QHA

ASTANA. QazAqparat - Qazirgi kezde Qazaqstanda 10 oblystyq jáne Almaty qalasynda 1 respýblıkalyq Dostyq úıi jumys isteýde. Astana qalasynda Dostyq úıi qyzmetin Beıbitshilik jáne kelisim saraıy atqarýda.

Bul týraly búgin Ortalyq kommýnıkatsııalar qyzmetinde ótken brıfıngte QR Parlamenti Májilisiniń depýtaty Nadejda Nesterova málim etti.

Onyń aıtýynsha, Qazaqstandaǵy tuńǵysh Dostyq úıi 1992 jyly Shyǵys Qazaqstan oblysynda jumysyn bastaǵan. Memleket basshysynyń QHA-nyń HH sessııasyndaǵy tapsyrmasyna sáıkes elimizdiń tórt óńirinde (Batys Qazaqstan, Qaraǵandy, Qyzylorda, Mańǵystaý oblystarynda) mamandandyrylǵan Dostyq úıiniń qurylysy júrip jatyr.

«QR Prezıdentiniń QHA-nyń HH sessııasynda bergen tapsyrmasyna sáıkes QR Úkimetiniń qaýlysymen QHA Dostyq úılerin damytý tujyrymdamasy bekitildi. Onyń maqsaty Assambleıanyń mindetterin sheshýge jáne onyń qyzmetin qamtamasyz etýge baǵyttalǵan beıbitshilik pen qoǵamdyq kelisim, áleýmettik bastamalar ortalyqtary retinde dostyq úıleriniń jumysyn uıymdastyrýdyń biryńǵaı tutas júıesin qalyptastyrý bolyp tabylady», - dep atap ótti depýtat.

Onyń aıtýynsha, Tujyrymdama 2 kezeńmen júzege asyrylady. 2014-2016 jyldar aralyǵynda QHA respýblıkalyq jáne óńirlik dostyq úıleriniń jumysyn uıymdastyrýdyń, mekemeler qurý arqyly olardyń biryńǵaı uıymdyq-quqyqtyq mártebesin qamtamasyz etýdiń tásilderi jasalatyn bolady. Al 2017-2020 jyldar aralyǵynda «Qazaqstan-2050» strategııasy jáne QHA damý tujyrymdamasy aıasynda QHA dostyq úılerin odan ári damytý júzege asyrylady.