Qazaqstanda 10 myńnan astam jol belgileri ornatylady

NUR-SULTAN. QazAqparat – Jyl saıyn Qazaqstanda qys aıy ótip, kóktemgi sý tasqyny oryn alǵannan keıin jol jabyndysyn jaqsartý jáne jol qozǵalysy qaýipsizdigin qamtamasyz etýge baǵyttalǵan aýqymdy jumys júrgiziledi, dep habarlaıdy QazAqparat tilshisi.

QR Indýstrııa jáne ınfraqurylymdyq damý mınıstrliginiń Telegram-ynda jarııalanǵan aqparatqa sáıkes, «QazAvtoJol» jumysshylary elimizdiń joldarynda shamamen 10 500 jol belgisin, 2500-den astam shaqyrym belgi, 410 aqparattyq panno jáne shamamen 32 myń dabyl baǵanyn ornatady. Buǵan qosa, 600 myń sharshy metr respýblıkalyq avtojoldy jóndeý josparlanyp otyr. Munan bólek, respýblıkalyq joldarda shamamen 40 myń tekshe metr qorshaýdy jáne 180 avtomobıl pavılonyn jóndeý kózdelgen.

Jalpy, bıyl jol jóndeýshiler jumysyn 14 baǵytta atqarady. Jumystardyń barlyǵy jol jabyndylarynyń buzylǵan jerlerin jóndeý, sondaı-aq jol qozǵalysynyń qaýipsizdigi men úzdiksizdigin qamtamasyz etý jónindegi keshendi baǵdarlama aıasynda júrgiziledi.