Qazaqstanda 10 myńǵa jýyq qyz-kelinshek ǵylym salasynda eńbek etip júr

NUR-SULTAN. QazAqparat - Búgin álemde ǵylymdaǵy áıelder men qyzdar kúni atap ótilýde. Osyǵan oraı Bilim jáne ǵylym mınıstri Ashat Aımaǵambetov ǵalym qyz-kelinshekterdi quttyqtady, dep habarlaıdy QazAqparat.

Qazaqstandyq ǵylym salasynda 10 myńǵa jýyq áıel bar. Olardyń 714-i ǵylym doktory, 2427 áıel – ǵylym kandıdaty, 992-si – PhD doktory, 28-i – beıindik doktorlar.

Osynshama názik jandar ǵylym salasynda tynymsyz eńbek etip júr.

«Jyl saıyn ǵylymdaǵy áıelder sany artyp kele jatqanyna qýanyshtymyn. Búginde olar elimizdegi jalpy ǵalymdar sanynyń 54%-yn quraıdy. Koronavırýs pandemııasymen kúres kezinde ǵalym áıelder aıanbaı eńbek etti. Mysaly, Zakarıa Kúnsulý Daltonovnanyń basshylyǵymen Bıologııalyq qaýipsizdik máseleleri ǵylymı-zertteý ınstıtýtynda COVID-19-ǵa qarsy qazaqstandyq QazCovid-in (QazVac) vaktsınasy daıyndaldy. Ǵylymdaǵy názik jandardy halyqaralyq merekemen quttyqtaımyn. Otandastarymyzdyń ómirin jaqsartý úshin jáne elimizdiń ǵylym salasyn damytýda atqaryp júrgen baǵa jetpes qyzmetterińiz úshin alǵys aıtamyn. Bıik belesterdi baǵyndyra berýlerińizge tilektespin» dep jazdy mınıstr Facebook paraqshasynda.