Qazaqstanda 10 myń kommertsııalyq jer paıdalanylmaı bos jatyr

NUR-SULTAN. QazAqparat – Kommertsııalyq jerlerdiń paıdalanylmaı jatýy ákimdikterdiń kinási. Bul týraly Bıznesti qorǵaý jónindegi IV forýmda QR Bas prokýrorynyń orynbasary Marat Ahmetjanov aıtty, dep habarlaıdy QazAqparat tilshisi.

«Bıznesti damytý úshin kedergi jasaýmen baılanysty máselelerdi saralaýdy jalǵastyryp jatyrmyz. Prokýratýra barlyq ýaqytta da zańnyń saqtalýyn eń joǵary qoıady. Biz kez kelgen jolmen kásipkerlerge kómektesý maqsatyn alǵa qoımaýymyz kerek jáne oǵan quqyǵymyz da joq. Bizdiń qorǵaýymyz adal ári zańǵa moıynsunatyn bıznesmenderge ǵana taralady. Máselen, jerdi paıdalanbaýmen problema bar. Sebebi óte kóp, olar bizge belgili de – ınfraqurylymnyń bolmaýy, qala qurylysy qujattary jáne basqalary. Eń negizgisi – bul ákimdikter tarapynan áreketsizdik jáne álsiz baqylaý»,- dedi ol.

Onyń atap ótýinshe, ákimdikterdiń kinásinen kommertsııalyq jerler jyldar boıy turyp qalady jáne aınalymǵa tartylmaıdy, jasandy tapshylyq týyndaıdy. Nátıjesinde adal kásipkerler jer telimin ala almaıdy ári bıznesin de damytýǵa múmkindigi joq.

«Bıyl biz 31,6 myń gektar paıdalanylmaı jatqan shamamen 10 myń kommertsııalyq jerdi anyqtadyq. Sondyqtan búgin aldymyzǵa jer berýdiń ashyqtyǵyn jáne onyń maqsatqa saı paıdalanylýyn qamtamasyz etý mindetin qoıyp otyrmyz. Bul úshin Aýyl sharýashylyǵy mınıstrligimen birlesip, jer ýchaskelerin bólý boıynsha elektrondy alań quryp jatyrmyz. Ol memlekettik organdar tarapynan jemqorlyq faktorlar men bıýrokrattyq kedergilerdi joıady», - dedi Marat Ahmetjanov.