Qazaqstanda 10 myńǵa jýyq ǵalym áıel bar - mınıstr
«Búgin dúnıejúzinde aıtýly mereke. Dálirek aıtar bolsam, osy kún – Ǵylymdaǵy áıelder men qyzdardyń halyqaralyq kúni. Osynaý merekege oraı elimizdegi ǵylym jáne joǵary bilim salasynda aıanbaı eńbek etip júrgen barsha qyz-kelinshekterdi ózimniń jáne mınıstriliktiń atynan shyn júrekten quttyqtaımyn!», - dep jazdy S. Nurbek áleýmettik jelidegi paraqshasynda.
Osy oraıda ol ǵylymnyń judyryqtaı jurnaǵyn ustaǵan ǵalym áıelder elimizdegi joǵary oqý oryndarynda, ǵylym ınstıtýttarynda, zertteý alańdarynda úzdiksiz eńbek etip jatqanyn atap ótti.
«Bul mereke 2015 jyldan beri BUU Bas Assambleıasynyń bekitýimen atalyp keledi. Aıshyqty meıramnyń barshamyz úshin orny bólek ekeni aqıqat. Óıtkeni, názik jandylardyń adamzat aldyndaǵy jaýapkershiligi joǵary. Ultty ushpaqqa shyǵaryp, urpaq tárbıeleýde ózindik qaıtalanbas qoltańbasy bar áıelder qaýymyna álem qaryzdar desem, artyq aıtpaǵanym bolar. Qazaqstanda 22 456 ǵalym bolsa, onyń 9 691-i áıel qaýymy. Bul – álbette úlken jetistik.
Tarıhymyzǵa zer salar bolsaq, qanshama ǵalym áıel-analar el tarıhyna, ult múddesine qyzmet etkenin ańǵarý qıyn emes. Bir ǵana mysal, Qazaqtyń tuńǵysh áıel dárigeri – Aqqaǵaz Dosjanova. Ol 1893 jyly Torǵaı oblysy Aqtóbe ýezi Bórti bolysynda týǵan. A.Dosjanova oqýyn bitirgen soń medıtsına mamandyǵy boıynsha gınekologııa jáne pedıatrııa salasynda qyzmet etken.
Sonymen qatar halqymyzdan shyqqan tuńǵysh geolog áıel-ǵalym – Patshaıym Tájibaeva. P.Tájibaevanyń geologııa ǵylymynyń ishindegi irgeli sala lıtologııanyń negizin qalaǵan qazaq qyzy. Mine, bizdiń ótkenimiz osyndaı tulǵalarmen jarqyn ári úlgi bolarlyqtaı. Keshegi Aqqaǵaz, Patshaıymdaı tulǵalardyń izbasary retinde Zakarıa Kúnsulý Daltonqyzyn atap ótpeske bolmas. K.Daltonqyzy Covid-19 qarsy qazaqstandyq QazVac vaktsınasyn jasap shyǵaryp, otandyq medıtsınaǵa qomaqty úles qosqan ǵalym. Oǵan qosa Kúnsulý hanym jaqynda ǵana álemniń TOP ǵalymdary qataryna endi», - dep jazdy mınıstr.