Qazaqstanda 10 kún ishinde 1635 zańsyz qoqys oryny joıyldy

NUR-SULTAN. QazAqparat – Ekologııa, geologııa jáne tabıǵı resýrstar mınıstri Maǵzum Myrzaǵalıev zańsyz qoqystardy tastaýǵa jol bermeý jáne ony joıý boıynsha qandaı jumystar atqarylyp jatqanyn aıtty, dep habarlaıdy QazAqparat tilshisi.

«Biz ákimdiktermen birlesip ǵaryshtyq monıtorıng barysynda anyqtalǵan Qazaqstan boıynsha barlyq zańsyz qoqys tastaıtyn jerlerdi joıýdy bastadyq. Bizdiń tapsyrys boıynsha «Qazaqstan Ǵarysh Sapary» monıtorıng júrgizdi. Ol 50 shaqyrym radıýstaǵy iri qalalardyń mańyndaǵy aýmaqty qamtıdy. Búgingi kúni elimizdiń barlyq óńirlerinde jeti jarym 7,5 myńnan astam qoqys oryndary anyqtaldy. Biz ákimdiktermen birlesip olardy joıý jónindegi jospar jasadyq. Tek sońǵy 10 kún ishinde 1635 zańsyz qoqys oryny joıyldy. Bul jalpy sannyń 20 paıyzyn quraıdy», - dedi Maǵzum Myrzaǵalıev OKQ-da ótken baspasóz máslıhatynda.

Onyń aıtýynsha, Qaraǵandy jáne Atyraý oblystarynda belsendi jumys júrgizilip jatyr.

«Ekinshiden, mınıstrlik ótken aptada árbir óńirdegi zańsyz qoqys oryndary boıynsha turǵyndardan aqparat jınaý úshin «jedel jeli» júıesin qosty. Ekranda tıisti aqparatty jiberýge bolatyn vatsap telefon nómirin (8-777-595-24-90) kóre alasyzdar. Alǵashqy 5 kún ishinde «jedel jelige» zańsyz qoqystar jaıly eki júz jıyrma úsh (223) habarlama kelip tústi. Úshinshiden, Іshki ister mınıstrligimen, qoǵammen, eriktilermen jáne jýrnalıstermen birlesip, biz zańsyz qoqys oryndary boıynsha aýqymdy qoǵamdyq reıdter júrgize bastadyq. Osy dúısenbi kúni, mysaly, elorda mańyndaǵy zańsyz qoqys oryndaryna reıd júrgizildi. Osyndaı reıdter barlyq óńirlerde júrgiziletin bolady. Olardyń nátıjeleri týraly buqaralyq aqparat quraldarynda jáne áleýmettik jelilerde únemi habarlaıtyn bolamyz», - dedi ol.