Qazaqstanda 10 qalanyń aýasy shekten tys lastanǵan

NUR-SULTAN. QazAqparat – Qazaqstanda 45 ónerkásiptik qala bar jáne onyń 10-ynda atmosferalyq aýa lastanýynyń eń joǵarǵy deńgeıi tirkeldi. Bul týraly QR Ekologııa, geologııa jáne tabıǵı resýrstar mınıstri Serikqalı Brekeshev aıtty, dep habarlaıdy QazAqparat tilshisi.

«Klımattyń ózgerýi men kómirtektik beıtaraptyqqa qol jetkizý máseleleriniń sheshimin ekologııalyq problemalardy sheshý arqyly taba alamyz. Qazaqstandaǵy negizgi ekologııalyq problemalar atmosferalyq aýanyń lastanýy, jerústi sýlary jáne qaldyqtarmen jumys isteý júıesiniń nasharlyǵy bolyp otyr», - dedi mınıstr Úkimet otyrysynda.

Atmosferalyq aýa monıtorıngine sáıkes, 45 ónerkásiptik qalanyń ishinde 10-y atmosferalyq aýa lastanýynyń joǵary deńgeıin kórsetýde. Olar – Nur-Sultan, Almaty, Qaraǵandy, Temirtaý, Atyraý, Aqtóbe, Balqash, Óskemen, Jezqazǵan jáne Shymkent qalalary.

«Lastanýdyń basty sebepteri – jabdyqtardyń tozýy, zaýyttardaǵy shań tazartý qondyrǵylary jumysynyń tıimsizdigi, jańǵyrtý men qaıta qurýdyń bolmaýy jáne kómirdi paıdalaný. Jerústi sýlarynyń lastanýynyń negizgi sebebi – kárizdik-tazartý qurylys jaılarynyń tozýy bolyp otyr. Al qaldyqtarmen jumys isteý salasynda qatty turmystyq qaldyqtar polıgondarynyń sanıtarlyq jáne ekologııalyq talaptarǵa sáıkes kelmeýi, olardy óńdeý deńgeıiniń tómendigi jáne stıhııalyq úıindiler problemalary ózekti bolyp tur», - dedi S. Brekeshev.