Qazaqstanda 1 mıllıonnan astam oqýshy dástúrli formatta oqı bastady

NUR-SULTAN. QazAqparat – Qazaqstandaǵy mektepterde josparly túrde úshinshi oqý toqsany 11 qańtarda bastaldy. Úshinshi toqsan 20 naýryzǵa deıin jalǵasady. QR Bilim jáne ǵylym vıtse-mınıstri Sholpan Karınova bul toqsanda sanıtarlyq ahýal eskerilip oqý protsesi ártúrli formattarda júrgiziletinin málim etti, dep habarlaıdy QazAqparat tilshisi.

Sholpan Qarınova OKQ-da ótken baspasóz máslıhatynda atap ótkendeı, dástúrli formatta oqytý jalpy bilim beretin mektepterde kezekshi synyptarda 1-den 5-synypqa deıin qosa alǵanda, halyqaralyq mektepterde 7-synypqa deıin ata-analardyń nemese ózge de zańdy ókilderdiń ótinishi boıynsha 15 baladan aspaıtyn synyptarda jalǵasady. Sonymen qatar kontıngenti 300 balaǵa deıingi mektepterde de oqýshylar dástúrli formatta oqıdy.

Bul toqsanda:

- menshik nysanyna qaramastan mektepterdiń bitirýshi synyptary (9,11 (12) synyptar) úshin oqýshylar shtattyq rejımde oqytyla bastady. Olarda pánderdiń 70%-y shtattyq rejımde, 30%-y qashyqtan oqytý usynyldy;

- sanıtarlyq-epıdemıologııalyq talaptardy qatań saqtaı otyryp, arnaıy mektep-ınternattardyń, jalpy úlgidegi mektep-ınternattardyń, mektep janyndaǵy ınternattardyń, daryndy balalarǵa arnalǵan mektep-ınternattarda turyp oqýyna ruqsat etildi.

Menshik nysanyna qaramastan bilim berý uıymdarynyń bitirýshi synyptary úshin oqytý aralas formatta uıymdastyrylady: pánderdiń 70%-y dástúrli formatta, al 30%-y qashyqtan oqytylady. Bıyl elimiz boıynsha bitirýshi synyptardaǵy oqýshylardyń sany 440 myńnan astam adamdy quraıdy.

Oqý protsesin aralas formatta uıymdastyrý kezinde sanıtarlyq-epıdemıologııalyq normalar saqtalyp, sabaqtardyń ıkemdi kestesi qurylady. Sonymen qatar áleýmettik qashyqtyqty saqtaý úshin aýysymdar men kishi aýysymdar sany ulǵaıtylyp, árbir synyp úshin sabaq arasyndaǵy úzilister ár túrli ýaqytta uıymdastyrylady. Sanıtarlyq talaptarǵa sáıkes mektepke kirý kezinde bilim alýshylar men pedagogterdiń dene qyzýyn kúndelikti ólsheý qajet.

Sondaı-aq, qajet bolǵan jaǵdaıda pedagogterdiń, oqýshylardyń jáne olardyń ata-analarynyń qalaýy boıynsha shtattyq formatta bilim alyp jatqan oqýshylar úshin mektepte jeke konsýltatsııalar ótkizýge ruqsat etilgen. Bir topta 5 adamnan artyq bolmaýy tıis.