Qazaqstanda 1,5 mln bótelke ishimdik jasyryn tsehtarda daıyndalǵan

NUR-SULTAN. QazAqparat - Ótken jyldan beri elimizdiń aýmaǵynda alkogol ónimderin jasyryn jolmen daıyndaıtyn 50-den astam tseh joıyldy. Bul týraly QR Qarjy mınıstrligi Qarjy monıtorıngi komıtetiniń tóraǵasy Janat Elımanov aıtty, dep habarlaıdy QazAqparat tilshisi.

«Zańsyz aınalymnan 1,5 mıllıonnan astam bótelke ishimdik, shamamen 400 myń lıtr spırt, sonymen qatar 500 myńnan astam jalǵan esepke alý-baqylaý markasy alyndy», - dedi ol búgin Ortalyq kommýnıkatsııalar qyzmetindegi baspasóz máslıhatynda.

Máselen, komıtet tóraǵasynyń dereginshe, Aqtóbe qalasynda araq óndirýshilerdiń biri esepke alynbaǵan 700 myńnan astam bótelke araq daıyndaǵan.

«Salyq tólemeýden keletin shyǵyn 570 mln teńgeni quraıdy. Shymkent qalasynda sapasy tómen spırt daıyndaıtyn jasyryn tseh joıyldy. Quny 31 mln teńge bolatyn 25 tonna spırt tárkilendi. Almaty oblysynda azamat Malashkın men Qarshyǵaev 40 tonnadan astam spırtti zańsyz tasymalǵandary jáne satqandary úshin qylmystyq jaýapkershilikke tartyldy. Mundaı mysaldar óte kóp. Bul sharalardyń barlyǵy kóptegen azamattyń ómiri men densaýlyǵyn saqtap qalýǵa múmkindik berdi», - dedi Janat Elımanov.