Qazaqstanda 1,1 mıllıard kılovatt-saǵat «jasyl» energııa óndirildi

ASTANA. QazAqparat - Qazaqstan Respýblıkasynyń Prezıdenti Nursultan Nazarbaev kásiporyndardy  energııa tıimdiligi men energııa únemdeýge,  energııa óndirýshilerdiń óz jumystarynyń ekologııalyq tazalyǵy men tıimdiligine qoıylatyn talaptardy arttyrýǵa qatysty ustanymdardy synı turǵydan qaıta pysyqtaýǵa shaqyrdy, dep habarlaıdy «QazAqparat» HAA tilshisi.

«Búginde álem boıynsha óndiriletin elektr energııasynyń tórtten biri jańartylatyn energııa kózderine tıesili. Boljam boıynsha, 2050 jylǵa qaraı bul kórsetkish 80 protsentke jetedi. Biz 2030 jylǵa qaraı Qazaqstandaǵy balamaly energııa úlesin 30 protsentke jetkizý mindetin qoıdyq. Qazir bizde jalpy qýattylyǵy 336 MVt bolatyn jańartylatyn energııa kózderiniń 55 nysany jumys isteıdi. Solarda 2017 jyly 1,1 mıllıard kılovatt-saǵat «jasyl» energııa óndirildi», - delingen QR Prezıdentiniń Qazaqstan halqyna Joldaýynda.

Elbasy «jasyl» tehnologııalarǵa ınvestıtsııa salý úshin bıznesti yntalandyrýdyń mańyzdy ekendigin qadap aıtyp, óńirlerdiń ákimderine shaǵyn jáne orta bıznes sýbektilerin keńinen tartyp, turmystyq qatty qaldyqtardy zaman talabyna saı ýtılızatsııalaý jáne qaıta óńdeý úshin sharalar qabyldaýdy tapsyrdy.

«Osy jáne basqa da sharalar zańnamaǵa, sonyń ishinde Ekologııalyq kodekske ózgerister engizýdi talap etedi», - delingen Joldaýda.