Qazaqstan zilzalaǵa qanshalyqty daıyn: QR Prezıdentiniń teleradıokesheni derekti fılm ázirledi

ASTANA. QazAqparat – Búgin qazaqstandyq telearnalardan QR Prezıdentiniń teleradıokesheni ázirlegen «Bezopasnoe zavtra» atty derekti fılmi kórsetiledi, dep habarlaıdy QazAqparat tilshisi.

Derekti fılmde jer sharynda bolyp jatqan jer silkinisi apttary jaıynda baıandalmaq. Jyl saıyn álemde myńdaǵan zilzala tirkeledi. Onyń ishinde 100-ge jýyq joıqyn jer silkinisinen adamdar qaza taýyp, tutas megapolıster jermen-jeksen bolady.

Sonymen qosa, taıaýda bolǵan Túrkııadaǵy iri zilzalanyń saldary áli kúnge deıin joıylyp jatyr. Bizdiń elimiz de seısmıkalyq turǵydan qaýipti memleketter qataryna enedi. Osy oraıda, búgin kórermenge jol tartatyn teletýyndyda Qazaqstannyń osyndaı apattarǵa qanshalyqty daıyn ekendigi, olardyń aldyn alý boıynsha atqarylyp jatqan sharalar tóńireginde baıandalady.

«Qaýipsiz erteń» derekti fılminiń kórsetilim kestesi:

25 aqpan

saǵat 17:45-te «Turkistan TV» telearnasy;

saǵat 21:05-te «Jibek joly» teleranasy;

saǵat 22:00-de «Almaty TV» telearnasy;

26 aqpan

saǵat 20:00-de «Jetisu TV» telearnasy;

27 aqpan

saǵat 10:10-da «MIR» telearnasy;

saǵat 20:00-de «Habar24» telearnasy.

Aıta ketsek, Prezıdent Almatyda seısmoaýdıt júrgizý josparyn maquldady.

Tótenshe jaǵdaılar vıtse-mınıstri Ibragım Kúlshimbaev Almatyda 9 baldyq jer silkinisi bolsa, turǵyn úılerdiń 30% qıraýy múmkin ekendigin aıtqan bolatyn.

Respýblıkalyq jedel-qutqarý jasaǵynyń basshysy Vladımır Tsoı almatylyqtarǵa jer silkinisi kezindegi qaýipsizdik sharalaryn túsindirdi.

Qosa keteıik, Prezıdent teleradıo kesheniniń rejısseri Serik Ibraımniń derekti fılmi búkilreseılik «Belaıa ptıtsa» festıvaliniń «Úzdik balalar derekti fılmi» nomınatsııasyn aldy.

Buǵan deıin Jibek Joly arnasynan Prezıdent teleradıokesheniniń «Qańtar oqıǵasy. Bir jyl» derekti fılmi kórsetildi.