Qazaqstan jylqy aýrýlarynan taza eldiń mártebesin alýy yqtımal
19:00, 17 Mamyr 2016
ASTANA. QazAqparat - Qazaqstan jylqy aýrýlarynan taza eldiń mártebesin alýy múmkin. Bul týraly búgin Ortalyq kommýnıkatsııalar qyzmetindegi baspasóz máslıhatynda Aýyl sharýashylyǵy vıtse-mınıstri Gúlmıra Isaeva málim etti.
Onyń aıtýynsha, bundaı mártebe elimizde sporttyq jylqy sharýashylyǵyn keńinen damytýǵa múmkindik beredi. Osy rette vıtse-mınıstr asyl tuqymdy tulparlardyń ıeleri kóbinese jylqy aýrýlary keń taralǵan elderdegi báıgelerge qatysý táýekeline barmaıtynyn atap ótti.
«Eger de Qazaqstan jylqy aýrýlarynan erkin el mártebesine alsa, biz halyqaralyq at jarystaryn ótkizý úshin paıdalanylatyn aımaqtardy belgileımiz. Bul turǵyda dástúrli túrde Almaty jáne Aqmola oblystary qamtylmaq. Osy oraıda biz elimizde halyqaralyq jarystardy qabyldaı alamyz»,-dep atap ótti G. Isaeva.