Qazaqstan jumyssyzdyq deńgeıiniń artýyna jol bermeýge áreket etýde

ASTANA. QazAqparat - «Jumyspen qamtý 2020 jol kartasy» baǵdarlamasy iske asyrylǵan ýaqyttan beri, ıaǵnı 2011 jyldan 2016 jyl aralyǵynda memlekettik qoldaý sharalary 744 myńnan astam adamǵa kórsetildi. Onyń ishinde 563 myń adam turaqty jumys oryndaryna jumysqa ornalasty. Osy jyldyń 9 aıynda baǵdarlamaǵa 146 myńnan astam adam tartylǵan eken.

QR Densaýlyq saqtaý jáne áleýmettik damý mınıstrliginiń málimetinshe, ótken bes jyldyń ishinde baǵdarlama aıasynda atqarylǵan sharalar eńbek naryǵyndaǵy sandyq ári sapalyq mándegi negizgi kórsetkishterdiń oń qarqynyna óz úlesin qosty dep aıtýymyzǵa bolady. 2010-2015 jyldary statıstıkalyq málimetterge qaraıtyn bolsaq, jumyspen qamtylǵan azamattardyń jalpy sany elimizde 6,3 paıyzǵa, al mekemelerde jumys isteıtin jaldamaly qyzmetkerlerdiń, ıaǵnı eńbek shartymen qyzmet isteıtin qyzmetkerlerdiń sany 17 paıyzǵa kóbeıdi.

Jalpy, aǵymdaǵy jyly 9 myńnan astam shaǵyn nesıelerdi bólý eskerilgen jáne ony alatyndar aýyldyq jerlerde qosymsha 12 myńǵa jýyq jumys oryndaryn quratyn bolady. Atap aıtqanda, kásipkerlik bastamalarǵa qoldaý jasalmaǵan jaǵdaıda halyqtyń jumyssyzdyq deńgeıi búginde 5,8 paıyzǵa jetýi yqtımal edi. 

Álemdik ekonomıkada oryn alǵan jaǵdaıǵa baılanysty jáne qyzmetkerlerdi jumystan bosatý qaýpine qaramastan, memleket qabyldap otyrǵan sharalar Qazaqstanda jumyssyzdyq kórsetkishin 5%-dyq kórsetkishte ustap otyrýǵa múmkindik berýde.

Jalpyǵa Ortaq Eńbek Qoǵamy ıdeıasyn halyq arasynda nasıhattaý boıynsha belsendi is-sharalar júzege asyrylyp jatqany belgili. Onyń qatarynda birneshe aýqymdy sharalar bar. Mınıstrlik málimetinshe, jastar arasynda elimizdiń ekonomıkalyq suranystaryna saı jumysshy kásipter men kásiptik bilim berýdiń bedeli men tanymaldylyǵyn arttyrý maqsatynda aǵymdaǵy jylǵy sáýir aıynan bastap qyrkúıek aıyna deıin jumysshy mamandyqtardyń «Worldskills Kazakhstan» ulttyq jáne óńirlik chempıonattary ótkizildi. Qazaqstannyń barlyq óńirlerinen kelgen 700-den astam qatysýshylar meıramhanalyq servıs, kondıter isi, shashtaraz isi, jelilik jáne júıelik ákimshilendirý, veb-dızaın, mehatronıka, qurǵaq qurylys jáne sylaqshylar  jumysy, kirpish qalaý, dánekerleý jumystary, bezendirý jumystary, mektepke deıingi tárbıe, kıim dızaıni, elektr montajdyq jumys salalary boıynsha úzdik ataný úshin baıqaýǵa qatysady.

Atap aıtqanda, Jalpyǵa Ortaq Eńbek Qoǵamy ıdeıasyn halyq arasynda nasıhattaý jáne Eńbek adamynyń bedelin arttyrý maqsatynda 2014 jyldan bastap «Eńbek kúni» merekesin atap ótý - mańyzdy sharalardyń biri bolyp tabylady. Elimizdiń barlyq aımaqtarynda Qazaqstan ekonomıkasyn damytýǵa jáne nyǵaıtýǵa óz úlesin qosqan eńbek ardagerlerine, eńbek áýletteriniń ókilderi men kásibı mamandarǵa qurmet kórsetilip,  Eńbek kúnine arnalǵan forýmdar ótýde.

Esterińizge sala keteıik, Ótken aptada Úkimet otyrysynda Nátıjeli jumys jáne jappaı kásipkerlikti damytý baǵdarlamasy tanystyryldy. Baǵdarlamanyń negizgi maqsatyna toqtalatyn bolsaq, azamattardyń jumysqa ornalasýy nemese óziniń isin ashý úshin qajetti kásibı daǵdyǵa jappaı oqytý men úıretý kózdelip otyr.

«Biz 2008 jyldan bastap jumyspen qamtý baǵdarlamalaryn iske asyryp kelemiz. Ózderińizge  belgili, bul baǵdarlamalardyń negizgi baǵyty álemdik qarjy daǵdarysy jáne oǵan jalǵasqan ekonomıkalyq turaqsyzdyq kezinde jumyssyzdar sanyn arttyrmaý boldy»,-dedi QR Densaýlyq saqtaý jáne áleýmettik damý mınıstri Tamara Dúısenova baǵdarlamany tanystyrý barysynda.

Onyń sózine qaraǵanda, atqarylǵan sharalardyń deni ýaqytsha jumysqa tartý, bos oryndarǵa ornalastyrý, oqytý jáne belgilengen jumys berýshige qyzmetke ornalastyrýdy eskerdi. Árıne, bul sharalardyń bári daǵdarysqa qarsy qadamdar retinde óz nátıjesin berdi.