Qazaqstan júk tasymaldaýshylary birqatar tólemderden jáne aıyppuldardan bosatyldy

NUR-SULTAN. QazAqparat - «Qazaqstan temir joly» UK» AQ Qazaqstannyń barlyq óńirlerinde tótenshe jaǵdaı kezeńinde júk tasymaldaýmen baılanysty aıyppuldardy, alymdardy jáne tólemderdi alyp tastady, dep habarlaıdy QazAqparat kompanııanyń baspasóz qyzmetine silteme jasap.

«Sheshim «Temir jol kóligi týraly» QR Zańy aıasynda, «Atameken» QR Ulttyq kásipkerler palatasynyń úndeýin eskere otyryp qabyldandy»,-delingen habarlamada.

Atap aıtqanda endi:

- júk tasymaldaý jospary boıynsha ótinimdi oryndamaǵany úshin aıyppul salynbaıdy;

- júk jóneltýshilerdiń, júk alýshylardyń, tarmaq ıelenýshilerdiń, vagondardyń (konteınerler) ıeleriniń kinásinen bolǵan, menshikti (jalǵa alynǵan) vagondardyń bos turǵany, magıstraldyq, stantsııalyq joldarda konteınerlerdiń kidirgeni úshin tólem alynbaıdy.

Budan basqa, fors-majorlyq jaǵdaılarǵa baılanysty júk alýshylarǵa júktiń mejeli stantsııaǵa kelgeni týraly habarlanǵan sátten bastap 48 saǵattan artyq turyp qalǵan júkterdi saqtaǵany úshin alym 10 eselik emes, bir eselik mólsherde alynady.