Qazaqstan JOO-larynda bilim alýǵa Qyrǵyzstannyń 50 azamatyna grant bólinedi

NUR-SULTAN. QazAqparat – Qazaqstan Úkimeti elimizdiń joǵary oqý oryndarynda bilim alý úshin Qyrǵyzstan azamattaryna jyl saıyn 50 grant bóledi. Bul týraly eki el Úkimetiniń ýaǵdalastyǵy negizinde ázirlengen kelisim qujatynda aıtylǵan, dep habarlaıdy QazAqparat tilshisi.

«Qazaqstannyń joǵary oqý oryndarynda bilim alý úshin Qyrǵyzstan azamattaryna jyl saıyn 50 orynǵa deıingi kólemde granttar usynylady. Qyrǵyz Respýblıkasynyń 15 azamatyna «aqparattyq-kommýnıkatsııalyq tehnologııalar», «ınjener, óńdeý jáne qurylys salalary», «aýyl sharýashylyǵy jáne bıoresýrstar» mamandyqtary boıynsha bilim alýǵa oryn bólinedi. Sonymen qatar 5 adamǵa medıtsınalyq mamandyqtar boıynsha oryn bólinedi. «Pedagogıka ǵylymdary», «óner jáne gýmanıtarııa ǵylymdary», «áleýmettik ǵylymdar, jýrnalıstıka jáne aqparat», «bıznes, basqarý jáne quqyq» mamandyqtaryna 10 adam qabyldanady.

Al Qyrǵyz Respýblıkasynyń azamattary bolyp tabylatyn ulty qazaq adamdarǵa elimizdiń joǵary jáne joǵary oqý ornynan keıingi bilim berý uıymdarynda 20 oryn qarastyrylǵan», - dep kórsetilgen qujatta.

Kelisim aıasynda qazaqstandyqtar da Qyrǵyzstannyń joǵary oqý oryndarynda oqı alady. Atap aıtqanda, kórshiles el tehnıkalyq mamandyqtarǵa – 4, medıtsına mamandyqtaryna – 3, gýmanıtarlyq-ekonomıka mamandyqtaryna 3 adamdy oqytady. Qujatqa sáıkes, Qazaqstan men Qyrǵyzstan tarapy jyl saıyn 30 naýryzǵa deıin bilim berý uıymdarynyń tizimin usynýy tıis.

Eki el Úkimeti arasyndaǵy qujat jobasy 2022 jylǵy 3 tamyzǵa deıin qoǵam talqylaýyna usynylǵan.