Qazaqstan joldarynda asa aýyr júk tasıtyn kólikterdiń qozǵalysy shekteldi

NUR-SULTAN. QazAqparat – Qazaqstanda asa aýyr júk tasyǵysh kólikter qozǵalysy ýaqytsha shekteledi, dep habarlaıdy QazAqparat tilshisi.

«Kóktemde tasjoldardyń konstrýktıvtik elementteriniń júk kóterý múmkindigi tómendeıtindikten, jeke biligine 8 tonnadan asa júkteme túsiretin júk kólikteriniń qozǵalysyna shekteý engizildi. Aımaqtardyń tabıǵı-klımattyq erekshelikterine baılanysty shekteý túrli ýaqytta engiziledi. Atap aıtqanda, 1 naýryz ben 1 sáýir aralyǵynda Almaty, Atyraý, Jambyl, Qyzylorda, Mańǵystaý jáne Túrkistan oblystarynda jáne Qaraǵandy oblysynyń Jezqazǵan óńiriniń joldarynda júk kólikteriniń qozǵalysyna shekteý engiziledi», - delingen QR Indýstrııa jáne ınfraqurylymdyq damý mınıstrliginiń baspasóz málimetinde.

Munymen qosa, 23 naýryz ben 1 mamyr aralyǵynda Shyǵys Qazaqstan, Aqmola, Aqtóbe, Batys Qazaqstan, Qostanaı, Pavlodar, Soltústik Qazaqstan jáne Qaraǵandy oblystarynyń joldarynda aýyr júk tasyǵysh kólikterdiń qozǵalysynda shekteý bolady.

Aıta ketý kerek, kóktemde qozǵalysty ýaqytsha shekteýdiń halyqaralyq kelisimderine sáıkes, júkter men jolaýshylardy halyqaralyq tasymaldaýdy júzege asyratyn, tótenshe jaǵdaılardyń aldyn alý jáne joıý jónindegi is-sharalarǵa qatysatyn, zardap shekkenderge gýmanıtarlyq kómek kórsetetin, tamaq ónimderin, jolaýshylar men qoljúgin, sondaı-aq dári-dármekter tasymaldaıtyn avtokólik quraldaryna qatysy bolmaıdy.

Eske sala keteıik, Qazaqstannyń avtomobıl joldarymen júrýge arnalǵan avtokólik quraldarynyń belgilengen ruqsat etilgen ólshemderin saqtaý – mindetti shart.