Qazaqstan joldarynda 100-den astam elektrondy tarazy paıda bolady
«Alǵashqy «tarazy-avtomat» qanatqaqty rejımde kelesi jyldyń maýsym aıyna deıin «Ekaterınbýrg-Almaty» avtojolynda, ıaǵnı Talapker kentiniń mańynda iske qosylady. Aýyr salmaqty júkterdi tasymaldaýdyń qarqyndylyǵy jol jabyndarynyń tozýy men buzylýyna aıtarlyqtaı áser etedi. Jańa tehnologııany - salmaqty ólsheýdiń avtomattandyrylǵan stantsııalaryn engizý júk kólik quraldarynyń barlyq aǵynyn salmaqty baqylaýmen qamtýǵa, barlyq ereje buzýshylardy anyqtaýǵa jáne ákimshilik jaýapqa tartýǵa múmkindik beredi. Osylaısha, tasymaldaýshylardyń tártibi men avtomobıl joldarynyń saqtalýy artady, olardy jóndeýge jumsalatyn shyǵyndar tómendetiledi», - delingen QR IIDM málimetinde.
Sonymen qatar, kóliktiń salmaq, gabarıttik parametrlerin ólsheý protsesi kóliktik baqylaý organdary ınspektorlarynyń qatysýynsyz avtomatty túrde júrgiziledi. Anyqtalǵan ereje buzýshylyqtar boıynsha ákimshilik praktıka «Sergek» júıesiniń jumys isteý qaǵıdaty boıynsha júzege asyrylatyn bolady. Bul adamı faktordy boldyrmaýǵa jáne kóliktik baqylaý júıesindegi ákimshilik kedergilerdi barynsha azaıtýǵa yqpal etedi.
«Kólik ınfraqurylymyn damytýdaǵy «Nurly jol» memlekettik baǵdarlamasy aıasynda 2025 jylǵa deıin Qazaqstan avtojoldarynda 112 avtomattandyrylǵan ólsheý stantsııalaryn ornatý josparlanýda», - delingen ótken habarlamada.