Qazaqstan joldardyń sapasy boıynsha aýtsaıder elderdiń qatarynda

NUR-SULTAN. QazAqparat - Qazaqstan joldardyń sapasy boıynsha aýtsaıder elderdiń qatarynda tur. Bul týraly búgin avtomobıl joldary salasyndaǵy problemalar talqylanǵan keńeste QR Sybaılas jemqorlyqqa qarsy is-qımyl agenttigi tóraǵasynyń birinshi orynbasary Oljas Bektenov aıtty, dep habarlaıdy QazAqparat tilshisi.

«Jol salý kez kelgen memleket úshin óte mańyzdy. Sondyqtan biz de oǵan úlken kóńil bólip jatyrmyz. Búgin barlyq problemalardy talqylap, tıisti sheshimderge kelemiz dep úmittenemin», - dedi jıyndy ashqan Oljas Bektenov.

Onyń dereginshe, 2018 jyldyń qorytyndysynda álem elderiniń avtomobıl joldarynyń sapasy reıtınginde Qazaqstan 140 eldiń ishinde 106 orynǵa turaqtaǵan. Bul óte nashar kórsetkish, aýtsaıderlik pozıtsııa sanalady.

«Oǵan belgili bir deńgeıde sybaılas jemqorlyq sebep bolyp otyr. Sońǵy 3,5 jyldyń ishinde jol qurylysy salasynda shamamen 100 jemqorlyq quqyq buzýshylyqtyń joly kesildi. Sottalǵandardyń qatarynda «QazAvtoJoldyń», jergilikti atqarýshy organdardyń «Obljolzerthanalar» bazasynda qurylǵan Jol aktıvteriniń sapa ortalyǵynyń laýazymdy tulǵalary jáne ózge de qurylymdardyń ókilderi bar. Kúni keshe ǵana BAQ-tan kórdińizder, «QazAvtoJoldyń» Pavlodar fılıalynyń jáne Jol zerthanasynyń basshylaryna úkim shyqty», - dedi ol.

O.Bektenovtyń atap ótýinshe, jol qurylysy salasyndaǵy jemqorlyq negizinen kelisimsharttarǵa qol qoıý úshin para berýmen, zańsyz kásipkerlik qyzmetke qamqorlyq jasaýmen jáne ákimshilik sharalar qoldanbaýmen, sonymen qatar memlekettik satyp alýlar barysynda aqsha qarajattaryn urlaýmen baılanysty bolyp otyr.