Mamandar eldegi asfaltbeton zaýyttaryn tekserýge kiristi

<p>ASTANA. KAZINFORM - Qazaqstan jol ǵylymı-zertteý ınstıtýtynyń mamandary Qazaqstandaǵy asfaltbeton zaýyttaryn tekserýge kiristi, dep habarlaıdy QR Kólik mınstrliginiń baspasóz qyzmeti.</p>

Baspasóz qyzmetiniń habarlaýynsha, zaýyttardyń jańa qurylys maýsymyna jáne asfaltbeton qospalaryn sapaly óndirýge daıyndyǵy tekseriledi, sondaı-aq jol-qurylys materıaldaryn synaıtyn zerthanalarǵa baqylaý júrgiziledi.

Qazirgi ýaqytta ǵylymı-zertteý ınstıtýtynyń sarapshylary men ǵalymdarynan quralǵan komıssııa Jol aktıvteriniń ulttyq sapa ortalyǵymen birlesip Jambyl oblysyndaǵy asfaltbeton zaýyttaryna zertteý júrgizip jatyr.

Qazaqstanda jalpy 300-den astam asfaltbeton zaýyty jumys istep tur. Otandyq jol ǵylymı-zertteý ınstıtýtynyń mamandary sapa standarttary men normatıvterge sáıkestigin tekserý maqsatynda árbir zaýytqa ınspektsııa júrgizýdi josparlap otyr.

Tekserý jumystarynyń nátıjeleri QR Kólik mınıstrligi Avtomobıl joldary komıtetiniń qoldaýymen qurylǵan rcmbase.kz jol-qurylys materıaldarynyń biryńǵaı bazasynda qoljetimdi bolady. Atalǵan bazada zaýyttyń ornalasqan orny, tehnıkalyq sıpattamalary, jobalarǵa qatysýy, zerthanalardyń bolýy, salmaq úlestirgishteriniń jaı-kúıi jáne asfaltbeton zaýyttarynyń ekologııalyq qaýipsizdigi jónindegi sharalardyń saqtalýy týraly derekter usynylady.

Esterińizge sala keteıik, jol-qurylys materıaldarynyń biryńǵaı bazasyn qurý jol-qurylys materıaldarynyń sapasyn arttyrýǵa, jetkizýshilerdi tańdaý kezinde ashyqtyqty qamtamasyz etýge jáne jol qurylysynda materıaldar men tehnologııalardy paıdalanýdy júıeleýge arnalǵan.