Qazaqstan JІÓ kólemin arttyrý úshin aýyl turǵyndaryna jaǵdaı jasaýy kerek - Bıshimbaev
Mınıstrliktiń baspasóz qyzmeti habarlaǵandaı, Ulttyq ekonomıka mınıstri Qýandyq Bıshimbaev eńbek kúshin tıimdi basqarý ekonomıkalyq ósimdi qamtamasyz etý tetigi dep esepteıdi.
«Mınıstrdiń aıtýynsha, Qazaqstanda 2,5 mln adam ózin ózi jumyspen qamtýshylar. Osynyń ishinde 500 myń adam shaǵyn bıznespen turaqty aınalysady. Olardyń sanyn kóbeıtýdiń birden bir joly - mıkrokredıtteý. Kelesi bóligi - maýsymdyq jumysshylar. Aýyl sharýashylyǵy, qurylys salasynda. Bul sanattaǵy jumys kúshi suranysqa ıe bolý úshin, kásibı turǵyda biliktilik kerek. 2017 jyldan bastap tegin kásiptik-tehnıkalyq bilim berý bastalady. Sońǵy úshinshi bóligi aýyl turǵyndary. Olarǵa óz ónimin naryqqa ótkizý - qıyndaý. Naryqtyq qatynasty damytý úshin ınfraqurylym qajet», - dep atap ótti mınıstrliktiń baspasóz qyzmetinen.
Qazir aýyl sharýashylyǵy mınıstrligi shıkizat qabyldaıtyn qyzmet kórsetýshi kooperatıvter uıymdastyrýdy qolǵa alǵany belgili boldy. Sút, et, teri alǵashqy óńdeýden ótken soń, zaýyttarǵa jóneltiledi. Biz bul máseleni McKinsey kompanııasymen talqyladyq. Olardyń esebinshe, eger ózin-ózi eńbekpen qamtýshy turǵyndardyń óndiristik ónimdiligin 80 paıyzǵa deıin jetkizsek, aldaǵy 5 jylda. munaı men gazdy qospaǵanda, olar 4-4,5% JІÓ ósimin qamtamasyz etedi.
«Ekonomıkalyq ósim úshin, qarjylyq, materıaldyq, jer, eńbek t.b resýrstar qajet. Mysaly 2000-jyldary munaı kompanııalarynyń ashylýymen kúrt ósim baıqaldy. Árıne, damyǵan elder jańa tehnologııalarǵa betburys jasap, basymdyq beredi. Bul tusta Qazaqstan óz artyqshylyǵyn utymdy paıdalanýy tıis. Aınalymǵa jańa resýrstar engizý qajet. Mysaly bizde 2 mln ga sýarmaly egin sharýashylyǵy alqaptary boldy. Sońǵy 10 jylda kóbisi qoldanystan shyǵyp qaldy. 1 gektar sýarmaly egistikten túsetin, ónim qyrdaǵy tálimi egistikten birneshe esege artyq. Osyny qaıta qolǵa alý kerek. Ekonomıkalyq aınalymǵa engizý úshin, ınvestıtsııa tartý kerek»,- dep atap ótti mınıstr Bıshimbaev Forbes Kazakhstan jýrnalyna bergen suhbatynda.