Qazaqstan Jenevada Adam quqyqtary jónindegi ulttyq baıandamany sátti bekitti

ASTANA. QazAqparat - Jeneva qalasynda ótip jatqan 28-shi sessııasy sheńberinde BUU Adam quqyqtary jónindegi keńesi Qazaqstannyń Ámbebap kezeńdik sholýdy ótýi boıynsha nátıjesin qarastyryp, Respýblıkamyzdyń adamnyń negizgi quqyqtary jáne erkindikteri salasyndaǵy halyqaralyq mindettemelerin oryndaý týraly esebin biraýyzdan bekitti. Bul týraly QR Ádilet mınıstrligi habarlady.

QR Ádilet mınıstriniń orynbasary Elvıra Ázimova bastaǵan delegatsııa Keńes múshelerine 2014 jylǵy qazanda ótken Sholý aıasynda Ulttyq baıandamamyzdy qorǵaýdan bergi merzimdegi Qazaqstannyń áleýmettik-ekonomıkalyq damýy týraly jańartylǵan aqparatty usyndy. Elimiz Ámbebap kezeńdik sholý sheńberinde qabyldaǵan usynystardy, onyń ishinde adam quqyqtaryn qorǵaý jáne ilgeriletý jónindegi barlyq halyqaralyq ınstrýmentterge qosylý boıynsha usynysty júzege asyrý boıynsha údemeli jumys atqarýda.

Atap aıtqanda, 2015 jylǵy aqpanda Qazaqstan Múgedekterdiń quqyqtaryn qorǵaý týraly halyqaralyq konventsııany resimdedi. Adam quqyqtary salasynda 2020 jylǵa deıingi ekinshi ulttyq is-sharalar josparynyń tujyrymdyq negizin jasaý naqty áreketter qolǵa alynýp keledi. Teńdesi joq ınstıtýt - Qazaqstan halqy Assambleıasy qyzmetiniń arqasynda elimizde ultaralyq jáne konfessııaaralyq kelisim qalyptasqan. Ústimizdegi jylǵy 10-11 maýsymda Astanada ótetin Álemdik jáne dástúrli din basshylarynyń V sezi Qazaqstan Respýblıkasynyń dinaralyq dıalogty ilgeriletý jáne damytý boıynsha dúnıejúzilik úderiske qosyp kele jatqan eleýli úlesi ekeni moıyndalyp otyr.

Sonymen qatar, QR Ádilet mınıstriniń orynbasary beıbitshilik, turaqtylyq jáne el birligi qazaqstandyq qoǵamnyń berekeli bolýynyń negizi bolyp qala beretini týraly habarlady. Elbasymyzdyń «Nurly jol» Qazaqstan halqyna joldaýynda elimiz damýynyń basymdyqtary retinde álemniń adamdardyń qaýipsiz jáne jaıly ómir súrýi qamtamasyz etilgen elin qurý anyqtalǵan. Osy rette, mańyzdy qadamdardyń biri «ashyq Úkimet» mehanızmin nyǵaıtý, onyń ishinde ashyq aqparatqa qol jetkizý týraly zańdy ázirleý men qabyldaý, sondaı-aq azamattyq qoǵamnyń ózin-ózi retteý qaǵıdattaryn kúsheıtý bolmaq.

QR delegatsııasy basshysynyń baıandamasynan keıin bolǵan ınteraktıvti dıalog barysynda BUU Adam quqyqtary jónindegi keńesine múshe jáne baıqaýshy memleketter, sondaı-aq úkimettik emes uıymdar Qazaqstandaǵy etnosaralyq jáne dinaralyq kelisimdi saqtaýdaǵy zańnamalyq, sot jáne ákimshilik is-sharalardy damytýdaǵy údemeli progresti, sondaı-aq zań ústemdigi qaǵıdattarynyń júzege asyrylýyn atap ótti.