Qazaqstan jemqorlyqpen kúreste nege Qytaı men Sıngapýrdyń tásilin qoldanbaıdy – Agenttik jaýaby

<p>ASTANA. KAZINFORM &ndash; Májilis depýtaty Gúldara Nurymova sybaılas jemqorlyqpen kúresti jetildirýge arnalǵan zań jobasyn talqylaý kezinde Qazaqstan nege bul iste Qytaı, Sıngapýr, Izraıl sııaqty elderdiń zańnamasyn basshylyqqa almaı otyrǵanyn surady.</p>

- Іs júzinde azamattar sybaılas jemqorlardyń áreketterinen zardap shegip jatyr. Qazirgi ádister qajetti tolyq nátıje bermeıdi. Osy máselede jetistikke jetken elderdiń ádisterin paıdalanýymyz kerek shyǵar dep eriksiz oılanasyń. Nelikten bizge, mysaly, Qytaıdyń, Sıngapýr men Izraıldiń tájirıbesiniń keıbir ádisterin paıdalanbasqa? Múmkin sol kezde sybaılas jemqorlyqqa qarsy kúrestiń nátıjeleri baıqalar... Sizdiń pikirińiz qandaı? - dep surady depýtat.

Sybaılas jemqorlyqqa qarsy is-qımyl agenttigi tóraǵasynyń birinshi orynbasary Ulan Sarqulov eshbir eldiń zańnamasyn kóz jumyp kóshirýge bolmaıtynyn aıtty.

- Basqa memlekettiń zańnamasyn biz kóz jumyp engizbeıtin shyǵarmyz endi. Bizge keletin normalardy engizemiz. Sybaılas jemqorlyqty toqtatý ár adamnan bastalady. Osy zań jobasynda kóp norma bar. Osy normalar bizdiń jemqorlyǵymyzdy azaıtady. Sondyqtan keıbir halyqaralyq standarttardy biz de zerdeleımiz, qaraımyz. Qaısysy bizge keledi, qaısysy kelmeıdi degen sııaqty, - dedi Ulan Sarqulov.

Aıta keteıik, Májilistiń jalpy otyrysynda sybaılas jemqorlyqqa qarsy is-qımyl máseleleri jónindegi zań jobasy talqylanyp jatyr.