Qazaqstan jazýshylary kezekten tys Prezıdent saılaýynyń ótýin qoldaıdy

ALMATY. QazAqparat - Búgin QR Jazýshylar odaǵy ǵımaratynda Prezıdenttiń kezekten tys saılaýyna qatysty jıyn ótti, dep habarlaıdy QazAqparat tilshisi.

Otyrys barysynda odaq músheleri, zııaly qaýym ókilderi Memleket basshysynyń úndeýine baılanysty óz pikirlerin ortaǵa saldy.

Qazaqstan Jazýshylar odaǵy basqarmasynyń tóraǵasy Ulyqbek Esdáýlet zııaly qaýym ókilderiniń pikiri qoǵam úshin mańyzdy ekendigin aıtty.

«2019 jyldyń 9 maýsymynda kezekten tys prezıdent saılaýyn ótkizý týraly úndeý jarııalandy. Bizge turaqty prezıdent kerek. El ishindegi, el syrtyndaǵy turaqtylyq úshin, ishki-syrtqy saıasat ary qaraı úılesimdi damýy úshin bul saılaý qajet ekenin túsinip otyrmyz», - dedi Ulyqbek Esdáýlet.

Jazýshy, synshy Maral Ysqaqbaı prezıdent saılaýynyń kezekten tys ótkizilýi qajettilikten týyp otyr dep sanaıdy.

Belgili jazýshy, dramatýrg Dýlat Isabekovtiń aıtýynsha, bul - el tarıhyndaǵy úlken oqıǵa.

Aıta ketý kerek, Aqorda Memleket basshysy Qasym-Jomart Toqaevtyń Qazaqstan Respýblıkasy Prezıdentiniń kezekten tys saılaýyn taǵaıyndaý týraly Jarlyǵyn jarııa etti.

Jarlyqqa sáıkes, Qazaqstan Respýblıkasy Prezıdentiniń kezekten tys saılaýy 2019 jyldyń 9 maýsymynda ótetin boldy.

Óz sózinde Qasym-Jomart Toqaev saılaýdyń ashyq, ádil ótetinine ózi kepildik beretinin aıtty.

«Qazaqstan - demokratııalyq memleket. Prezıdent halyqtyń tańdaýymen saılanady. Men, Memleket basshysy retinde, saılaýdyń taza, ashyq ári ádil ótýine kepildik beremin! Bul - meniń berik ustanymym! Aldymyzda zor mindetter tur. Men halqymyzǵa, ıaǵnı Sizderge senemin», - dedi Qasym-Jomart Toqaev.