Qazaqstan jaıly jazǵan sheteldik úzdik tilshiler anyqtaldy
El Táýelsizdiginiń 30 jyldyǵyna oraı «Qazaqstan sheteldik BAQ kózimen» atty halyqaralyq baıqaý ótti. Ony uıymdastyrýshy QR Syrtqy ister mınıstrligi men Qazaqstan bas redaktorlar klýby.
Uıymdastyrýshylardyń aıtýynsha, osymen 6-shy ret ótip otyrǵan atalǵan baıqaýǵa álemniń 36 elinen 60 tilshi qatysqan.
«Aldymen qonaqtarǵa Qazaqstanǵa qosh keldińizder deımin. Biz elge qyzyǵýshylyq tanytyp, ol týraly materıal jazǵandaryńyz úshin alǵys bildiremiz. Baıqaýǵa kelip túsken materıaldar ártúrli baǵytta boldy. Onyń ishinde Qazaqstannyń ekonomıkasy, saıasaty, halyqaralyq qatynays, tarıh, mádenıet, týrızm, densaýlyq saqtaý, sport, ıadrolyq qarýsyzdandyrý, energııa kózderi taqyryby qamtyldy. Odan bólek, baıqaýǵa Ábý Nasyr ál-Farabı men aqyn Abaı Qunanbaıuly murasyna arnalǵan jumystar kelip tústi. Olar televızııa, gazet jáne saıttarda jaryq kórdi. Árıne pandemııaǵa baılanysty birqatar shekteý bolǵany ras. Degenmen baıqaý onlaın ótkendikten qatysýshylardyń qyzyǵýshylyǵy azaıǵan joq. Búgin mine halyqaralyq baıqaý óz máresine jetip, jeńimpazdardy elordamyzǵa qarsy alyp otyrmyz», - dedi QR Syrtqy ister mınıstriniń orynbasary Erlan Álimbaev.
Qazylar alqasynyń sheshimimen baıqaý nátıjesinde Qazaqstan jaıly jazǵan 6 avtor jeńimpaz atandy.
Olardyń qatarynda «Lıtvalyq kýrer» aptalyq basylymdarynyń jáne «Eho Lıtva» gazetiniń bas redaktory Nıkolaıýs Jýkovas (Lıtva), «Financne Noviny» basylymynyń bas redaktory Vladımır Bachıshın (Slovakııa), Pákistannyń jahandyq jáne strategııalyq zertteýler ortalyǵynyń aımaqtyq sarapshysy Mehmýd Ýl Hassan Han (Pákistan), Kanadanyń kóshi-qon jáne mýltıkýltýralızm máseleleri jónindegi burynǵy mınıstri Tonı Rýpreht (Kanada), «BCI Media» kompanııasynyń kommertsııalyq prodıýseri Inga Cherneı (Kanada) jáne MNB telearnasynyń tilshisi Tsolmon Baterdene (Mońǵolııa) bar.
«Elimizdiń jetistikterin sheteldik BAQ-tyń jazyp jatqany qýantady. Tilshilerdiń jumysy árqashan halyq nazarynda. Áriptesterimniń qandaı jaǵdaıda jumys isteıtinimen tanyspyn, ózim de jýrnalıspin. Qazirgi ýaqytta álemdegi epıdahýaldy bilesizder, soǵan qaramastan tilshiler árdaıym aldyńǵy shepte júredi. Baıqaýǵa sheteldik BAQ ókilderi belsene qatysty. Osy 6 jyldyń ishinde baıqaýǵa álemniń ártúrli elinen júzdegen tilshi Qazaqstan jaıly jazdy. Uıymdastyrylyp otyrǵan shara tek Qazaqstan jaıly materıaldar jazýymen shektelmeıdi, bul qazaq jýrnalıstıkasynyń bedelin arttyryp, áriptesterimizdiń kásibı damı túsýine úlesin tıgized», - dedi Qazaqstan bas redaktorlary klýbynyń prezıdenti Bıbigúl Jeksenbaı.
Baıqaý jeńimpazdary syı-sııapattan bólek, elimizdiń kórikti qalalary Nur-Sultan, Almaty, Túrkistan jáne Býrabaı demalys aımaǵyna barý múmkindigine ıe boldy.
«Jyly qarsy alǵandaryńyz úshin alǵysymdy bildiremin. Qazaqstanǵa kelgenime qýanyshtymyn. Bizdiń Premer- mınıstr QR Prezıdentimen kezdesý ótkizdi, bul úlken saıası qadam. Biz Qazaqstannyń jetistikteri týraly kóp bilemiz. Qazaqstan álem tilshileriniń nazarynda desemde bolady. Sondaı-aq, Qazaqstannyń Ortalyq Azııa boıynsha úlgi tutatyn el retinde ǵana emes, álemdik deńgeıde úlgi alarlyq tustary jetkilikti. Osy oraıda el Prezıdenti Qasym-Jomart Toqaev myrzanyń myna sózi esime túsip tur. «Biz búginde jańa álemde ómir súrip jatyrmyz. Ómirde bolyp jatqan ózgeristi saralap, shuǵyl sheshim qabyldaı bilýimiz kerek», - dedi ol. Kanadanyń kóshi-qon jáne mýltıkýltýralızm máseleleri jónindegi burynǵy mınıstri, baıqaý jeńimpazy Tonı Rýpreht.