Qazaqstan Jasyl klımattyq qordan 280 mln dollar qarjy almaq
Onyń aıtýynsha, Qazaqstan BUU damý baǵdarlamasy men Eýrazııalyq qaıta qurý jáne damý bankimen birlesip Jasyl klımattyq qordan qarjy alýǵa ótinim bergen.
«Jasyl klımattyq qorǵa qatysty aıtar bolsam, bul - óte mańyzdy bastama. Shamamen 280 mln dollar soma alýǵa arnalǵan ótinim bir jyldan astam ýaqyt boıy daıyndaldy. Eger de ol maquldanatyn bolsa, onda biz túrli sektorlardaǵy jobalardy júzege asyrý úshin jeńildetilgen qarjy ala alatyn edik. Bul rette qurylysta, turǵyn úı-kommýnaldyq sharýashylyǵynda jáne basqa da salalarda energııa únemdeıtin tehnologııalarǵa, energııa tıimdiligin arttyrýǵa basymdyq beriletin bolady», - dedi vıtse-mınıstr.
Sonymen qatar ol aldaǵy 3-4 jyldyń ishinde damýshy jáne damyǵan elderdiń energııa teńgeriminde jańaratyn energııa kózderiniń úlesi kúrt asatyndyǵy boljanyp otyrǵandyǵyn aıtty.
«Boljamǵa sáıkes kún jáne jel energııasynyń úlesi 2014 jylǵy 9 paıyzdan 2030 jyly 22 paıyzǵa deıin artady. 2030 jylǵa qaraı tek kúnnen alynatyn energııa qýaty 2012 jylǵa qaraǵanda 13 esege artatyndyǵy boljanýda. 2015 jyly jahandyq ınvestıtsııanyń 30 paıyzy jańaratyn energııa kózderi men energııa tıimdiligi sektoryna salynǵan bolatyn», - dedi Ábilqasymova.
Aıta keteıik, forým jumysyna álemniń 25 elinen 300-den astam delegat qatysýda. Olardyń arasynda QR Memlekettik hatshysy Gúlshara Ábdiqalyqova, RF Federaldy jınalysynyń Federatsııa keńesi tóraıymynyń orynbasary Galına Karelova, Belarýs Prezıdenti Ákimshiliginiń basshysy Natalıa Kochanova, Qyrǵyzstannyń vıtse-permer-mınıstri Cholpan Sultanbekova, Jahandyq áıelder sammıtiniń prezıdenti Iren Natıvıdad, jasyl ekonomıka men balamaly energetıka salasyndaǵy álemdik áıelder qaýymynyń, memlekettik organdardyń, bıznes salasynyń, úkimettik emes uıymdar men Qazaqstan áıelder qoǵamdastyǵynyń ókilderi bar.